Abraham Mwanyekange 

ONDANGWA – Kakukutu komatanaga opolifi Joseph Shikongo okwa holola kutya oilyo yovakainhu novalumenhu ovo hava lwifa oimbuluma hano Women and Men Network ve li 140 otava ka pewa oilonga mopolifi. 

Shikongo okwa ti opolifi ihai kutu ashike ovo ve na oitwa noulongelwe wopombada ashike ohai kutu yo ovakainhu novalumenhu tava kondjifa oimbuluma, ovaliyambi vopolifi navakwao vamwe. 

Shikongo edi okwe di popya onghela eshi kwa li ta popifa nokulongekida ovadeulwapolifi 1 038 ve li momadeulo koRuben Danger Ashipala mOndangwa. 

Kakukutu kopolifi okwa ti opolifi oya kufa ovanhu 140 mehangano lovalumenhu novakainhu tava lwifa oimbuluma loMen and Women Network. Shikongo okwa weda ko ta ti ova kufa yo movaliyambipolifi molwaasho pefimbo loCovid-19 vamwe okwa li va kanifa oilonga. 

“Otwa kufa yo yoo va li muvakwetu ava vehe na oulongelwe washa nosho yo eemhito dokumona omauwa aeshe,” kakukutu ta weda ko. Shikongo okwa longifa yo omhito opo a lombwele nokudimbulukifa ovadeulwapolifi kutya ngeenge va di mo momadeulo avo nava ka kwatele po naana omalalakano noishonekwa yopolifi. 

“Onda loloka omatumbulo ngaashi, katu na otuwa, itatu dulu oku uya okuvatela, onghee onda hala mu ka kwafe oshiwana,” Shikongo ta ti ngaho. 

Shikongo okwa ti oshiwana nashi pewe omakwafo ngaashi tashi a pumbwa pefimbo nomeendelelo. 

Okwa weda ko ta ti okwa hala ovapolifi ve na ohokwe noilonga yavo opo va twale etanga lopolifi pombada li tambulwe ko nokufimanekwa kOvanamibia, Africa osho yo ounyuni aushe. 

Kakukutu ta kunghilile ava tava waimine etanga nomalalakano a yooloka ve likwafe opo vaha shindule ondjelo yalo. “Paife ondi na mo eedula omi-47 mopolifi no inandi hala vali oilonga imwe molwaashi onda hafa,” tati. 

Okwe va dimbulukifa opo va ka tule moilonga aishe oyo tava pewa momadeulo avo. 

“Ka ameneni omaliko oshiwana, eemwenyo dovanhu naadi doinamwenyo,” ta londwele. Shikongo okwa ti okwa teelela keshe omupolifi a kale a wanifa po nokuumbata aishe oyo e na okukala e na pefimbo ta longo oilonga yaye ngaashi okambo kekotamhango loshilongo naaka keeveta dopolifi, ta weda ko ta ti okwa loloka okumona ovapolifi vofaasa vehe shi ongushu yavo nongushu yehangano lopolifi. “Openi wa mona omukulunhu woshitaashi te ya koilonga nekwamo lihe na sha? Okudja nena keshe omupoifi na kale e na oihumbatomwa aishe oyo a pewa kepangelo molwaasho oya fimana”, ta hanyene. 

Ovadeulwapolifi ovateelelwa ve ke lideule koitaashi yopolifi oshilongo ashishe okutameka momafiku omuwoyi a Maarsa fiyo opetameko laMai. 

-abbenghilai@gmail.com