ONGWEDIVA – Mayola wodoolopa yaShakati Leornard Hango okwa kunghilila ovakalimo vomeni lodoolopa ava ve hole okudengela omalukalwa peenhele hadi hada omeva ve shi xulife po.

Eshi okwe shi popya konima eshi ovakalimo vokolukanda loKasikili meni lodoolopa va hangwa komeva odula ombaadilila, oo a ya fiyo omeenduda.

Asteria Abasolm, omukalimo wokolukanda laKasikili okwa ti vo ove li mo nai komeva odula. Pomudingonoko vati kape na nande oundjuwo vasha, ovanhu ohave livatele ashike moluhaela.

“Paife omeva onyata aeshe ohaa ende ashike taa kunguluka a yuka meenduda dovanhu dokunangala,” ta ti. Okwa twikila kutya natango onghalo oya nyikila ounona vashona oshiponga, shaashi ngeenge oka wile momeva otaka dulu okufya.

Hango okwa ti ouyelele osho yo omakemo aa okwa fika kombelewa yaye, ashike okwa holola enyeme laye kutya ovakalimo ova li nale va lombwelwa kutya ponhele apa va hala okudengela omalukalwa avo ohapu hada omeva ndele ova twikila ashike.

“Paife eshi ve li moupyakadi otava lilile elelodoolopa nonande va kunghililwa kutya otava tungu peenhele hadi hada omeva kamana,” ta ti. 

Okwa twikila kutya ombelewa yaye oya tuma eeyindjiniya va ka pombe mo omeva oo a ye meeshana edi da kula, ashike olo kali shi ekandulepo lofaafaa shaashi onhele ondobe nale keshito.

“Eli olo ashike ekwafo hatu dulu okuyandja kovakalimo ava shaashi katu na kutya ohatu va tula peni,” ta ti -taimihaihambo2000@gmail