Abraham Mwanyekange

Ovalandifi vamwe vomomapandavanda aNdangwa ovo va tembulilwa komatala ape a-ABC-Extesion otava ti kave uditile ombili elelo lodoolopa yaNdangwa molwa ye va tula momatala e na edundakano. 

Asteria Uudhigu okwa lombwela Kundana kutya elelolodoolopa otali ende nakashona okuwanifa po osho le va udanekela, ta ti paife momatala ova ningamo oshivike ndele edundakano ashike li li mo. 

Tati imwe yomomaudaneko a ningwa kelelo ongaashi, oku va tulila po omudile apa tava landifile, oundjuwo osho yo eameno li li nawa. 

“Otwa hala elelo lodoolopa li tete po omwandi u li momatala u na outoni paenghulunghedi detu dOvawambo,” ta ti. 

Uudighu ota ti omwandi otau dulu u kale umwe yomwaayo tai eta edundakano momatala. 

Okwa ti omwandi owe limangelekela ovanhu va koya puvahetatu. 

Teopo, umwe womovalandifi ota ti omepo yomalidengo nomatukano otai dana onghandangala pokati kOvanamibia nOvaangola efiku nefiku. 

Omanga Paulus ta tumbula kutya okwa pandula elelolodoolopa molwaaasho momatala eshi ve limo itava futu, ashike okwa indila kelelo opo li wapaleke mo nawa momatala, ta ti okwa kaka nongeenge odula ya loko ohaa hada omeva. 

“Otwa lopota nokamainolo ka topa ndele paife ngaha oshivike elelo inali uya po apa, paife otwa fa ashike twa tulwa ketoto loimbodi,” Paulus okwa indila elelo li kongolole mo aveshe ovo ve li momapandavanda navo ve va weimine momatala nongeenge hasho navo mOmaandaxa otava shuna momapandavanda, ta pula elelo li va kombe noshikombe shimwe. 

Omupopiliko welelo lodoolopa yandangwa Petrina Shitalalangaho-Mutikisha okwa ti elelo ole litula mo nokumona kutya omatala mape a tulwa pondodo yopamufika noku na eameno . 

“Omatala oo okwa tulilwa po Ovanamibia opo va kale monhele i na elandulafano i li nawa omo tava dulu okulandifila mo oilandifomwa yavo ngaashi okapana,” Mutikiisha ta ti. 

Okwa weda ko kutya Ovanamibia ovo tava vakele Ovaangola momatala omanga kwa li ashike ovo ve a nuninwa. 

Okwa kwashilipaleka ovalandifi kutya otava ka mona ovalandi vahapu nawa molwaasho okapale keetaksi nako opo ta ka ka tulwa pomatala opo omolwa pena onhele ya andjukila nawa omatukutuku. 

Kombinga yomwandi okwa ti mombelewa yelelo inamufika natango omukandaindilo opo u tetwe po, ta weda ko ta ti kape na natango osho tashi ulike kutya omwandi owelimangelekela ovanhu vomwaalu oo. 

Shitalangaho-Mutikisha okwa indila ovalandifi alushe va lopote kelelo uuna tave lihange ve li momaupyakadi. 

Okwevalondwela tati navahulifepo okulandifa oyo yaindikwa momatala.

-abbenghilai@gmail.com