Auleria Wakudumo

Ouministeli wounamapya nounaimuna, omeva, eeshi nomatalululo omadu opamwe nouministeli wehongo, oungoba, omaudano novanyasha owa unganeka oshoongalele shonhomenawino okundungika ovanyasha mounamapya nounaimuna konooli. 

Ovanyanyamaulu okudja koitukulwa yokonooli ngaashi Oshana, Ohangwena, Oshikoto nOmusati. Oshoongalele eshi osha hovela Etitatu nosha xula Omaandaxa mOshakati. 

Omupeduminista wehongo Dino Balloti okwa twa ovanyanyamaulu omukumo opo va kufe ombinga momadeulo oo a li taa ningwa moshoongalele opo va dule okulikola owino mounamapya nounaimuna. 

“Eshi tamu teke moshoongalele otamu ke shi longifa okuya po neengeshefa deni ile okuyambula po eengeshefa kwaavo va hovela nale,” minista ta holola ngaho. 

Ngoloneya woshitukulwa shaShana Hofni Iipinge okwa kumaida ovanyasha opo vaha kale ashike tava holoka poyoongalele ndele tava ka tule moilonga eshi va li tava ndungikwa moshoongalele. 

“Ngeenge owe shi pondola, ito lundulula ashike onghalamwneyo yoye ndele oto tula yo pombada eliko loshilongo,” ngoloneya ta holola ngaho. 

Iipinge okwa holola kutya ovanyasha nava lunduluke okudja kokukala ve likolelela kepangelo va kale kuvo vene. 

Ta ti osha fimana okudja kokuhe na oilonga wa uka kounangeshefa. Okumona oyuuyemo kwoove mwene nokuyandja oilonga kovanyasha vakwao. 

Ngoloneya okwa indila ovanyanyamaulu opo va kale ve litula mo nokukala ve na omikalo moilonga yavo. 

“Eengeshefa nomahangano mahapu ohaa teka po molwomikalo nelitulemo moilonga. Ngeenge owe likolelele komhangela itihamano yoNational Development (NDP6) oyo tai wilike exumokomesho neyambulepo loshilongo nounamapya nounaimuna, nena oto dulu okufindana nokuhanga omalalakano oye,” ngoloneya ta kumaida ngaho. 

Oshoongalele eshi osha li tashi wilike, ndungike osho yo okuyandja owino mounamapya nounaimuna kovanyanyamaulu. 

-awakudumo@nepc.com.na