Ovatoolinghundana
Minista wemona Ericah Shafudah okwa teelelwa a kale a pitifa omutengenekwafaneko woshimaliwa wo2026/2027 mongula. Lesha omaliudo oshiwana kombinga yomutengenekwafaneko oo tau piti mongula.
David Alfeus
Ondi na omaliudo a yooloka kombinga yomutengenekwafaneko. Onda teelela omutengenekwafaneko woneudo u kale wa kwatela mo omaupyakadi ehongo ngaashi okukwashilipaleka kutya eefikola odi na oikwafifohongo ya wana neengulu dokulihongela da wana ovanafikola. Onda hala omutengenekwafaneko u tule moilonga eemhumbwe doshilongo odo da pumbwa ekandulepo lomeendelelo.
Pomwene Mwoonde
Ame ondi na omaliudo a yooloka kombinga yomutengenekwafaneko woludi eli. Onde likwata pomutima shaashi nghi shi ngeenge tau ka kwafa ovanhu aveshe ile otau ka longa ashike ombinga imwe. Ashike ondjodi yange ngeno oye yi ngaho kutya u kale wa kwafa ovanhu aveshe koikondo aishe, ndele onda hala u denge omufindo pehongo osho yo pouhaku.
Simeon Josef
Ame onda lulilwa kokukala ndi li meumbo. Onda hala oilonga, ngeno okwa li ngaho epangelo tali shi longo mo nawa momutengenekwafaneko woshikando eshi, ndele hatu pewa oilonga, oshili ohandi ka pandula.
Tangi Lineekela
Onda hala ngeno omutengenekwafaneko woneudo uha kale ashike wa tala okuyandja omwakwafo keenhele domeedoolopa, ndele nokomaushai nako naku dengwe ngaho omufindo. Natango ngeno oshilongo okwa li ngaho tashi tula eendjo edi shi na moilonga opo di kale da futwa pefimbo, naashi otashi kala shiwa, opo tuha kale vali tu li meendjo eenduba. Pamwe osho ngeenge osha wanifwa po, pamwe epangelo tali yeululile ovanyasha eemhito doilonga.
Dr Likius Hailaula
Efaneko lelongifo loshimaliwa loshilongo nali denge omufindo po ku eta ouhaku wopaungoba popepi novakwashiwana, osho yo u kale tau dulu okulongifwa kwaavo vehe na oyuuyemo I li pombada.
Ovanamibia vahapu, unene tuu ovo ve li momikunda dokokule natango ove na okweenda oinano ile opo va mone omauhaku opashinanena, ile va mone omiti edi di na okukala hadi monika poupangelo vashona. Oupangelo vomomikunda nava nghonopalekwe, vo va kale hava yandje omayakulo a yooloka, ngaashi eex-ray, nava pewe yo oondokotola va pyokoka nawa momikifi donhumba, vaha kale ashike ve lilongela meedoolopa nomoilando. Ouhaku nau ye kOvanamibia aveshe.
Oshitivali, ovanhu vahapu moNamibia ohava fi komikifi odo hadi dulu okupangwa ile okukelelwa. Ashike, omolwovanhu vahapu vehe na omedical aid ile vehe na oyuuyemo yasha, ihava dulu okumona omakwafo amwe, shaashi oku na ondilo. Efaneko eli nali denge yo omufindo pokukwashilipaleka kutya keshe Omunamibia (omuyamba ile ehe shi omuyamba) na mone ouhaku nomakwafo a faafana.