Auleria Wakudumo 

Mayola wodoolopa yaNdangwa Ester Auala okwa yandja omidjalo dofikola kovahongwa 30 okudja keefikola mbali da yooloka. 

Mayola okwa yandja omidjalo kovahongwa vokofikola Etambo Combined osho yo Olukolo Primary School. 

Mayola okwa kwafa ovanafikola ve li 15 kofikola keshe. Ovanafikola ova pewa omudjalo wodalaxa we lixwa po osho yo eepena dokushanga di li 120 oshoyo oututa woukadona ve li 80. 

Auala okwa kwafa okudja mondjato yaye mwene.

“Onda tokola okukwafa ovahongwa ovo ve li momhumbwe opo va dule okukala mofikola mokumana elihongo lavo,” mayola ta holola ngaho. 

Eshi kashi li oshikando shotete mayola ta i mondjato okukwafa oohembundangele mehongo. 

“Ondi shi shi vamwe vomunye kamu na omidjalo dofikola. Onda hala oku mu dimbulukifa kutya ehongo ola fimana shi dulife omidjalo edi di li kolutu. Ila kofikola ndele to litula momambo opo u hange ondjodi yoye,” Auala ta ti. 

Mayola okwa holola kutya oshiwana oshi na ovahongwa komutima notashi twikile oku va kwafa. 

Okwa indila ovahongwa opo va pule ekwafo alushe ngeenge v eli momhumbwe.

-awakudumo@nepc.com.na