Okwa lopotwa ovanyasha va ninga oihakanwa yokulimangeleka omo omulumenhu weedula 23 a xulifa eshi e limangelekela koshi yomuti mekove lambulavo.
Oshiningwanima osha ningwa Olomakaya komukunda Okatope moshitukulwa shaHangwena efimbo lomutenya.
Nakufya okwa tongololwa oye Nghilifavali Nghidipomwene Ngube, omukalimo womomukunda Okatope.
Omukulunhu koshikondo shokukonakona oimbuluma wopolifi moshitukulwa shaHangwena, omupedukomufala Melani Mburu okwa koleka oshiningwanima eshi.
Otaku hokololwa kutya omulumenhu ou ka li ta ulike omadidiliko okulimangeleka.
Opolifi oya koleka kutya Ngube ina fiya po omukanda tau yandje ouyelele kombinga yefyo laye.
Omakonakono opolifi otaa twikile moshikumungu eshi.
Opolifi oya kumaida oshiwana opo shi ka konge omakwafo kovaxungimwenyo ile ovafitaongalo ngeenge tashi hepekwa koupyakadi wopamadilaadilo shaashi okulimangeleka kaku shi ekandulepo lomukundu.
Opolifi oya ti otashi kwafele ngeenge omunhu ta ka konga omakwafo kovaxungimwenyo ile kovafitaongalo molwaashi ohava yandje exungomwenyo tali kelele omunhu opo aha kwatwe komhepo yokulimangeleka.
Natango, koshitukulwa shaHangwena konima yoivike ivali okwa lopotwa omukulupe weedula 88 e limangeleka osho shi li tashi limbilike unene.