Abraham Mwanyekange
Ovalumenhu vahapu otave lihange va ninga oihakanwa yomahepeko opoukashikekookanhu ndele otava nyengwa oku shi popya mo, molwaashi nande vati va ka lopote oimbuluma ihava mono ko omakwafo nongeenge ova mono omakwafo shapo ongeenge tava shekwa nokuyolwa.
Ta kaloke edi, omushamane Jason Ngula weedula 58 momukunda Ondiikalela moshitopolwa Oshikoto okwa ti oku li monghalo yonghuwo i na onghambe nokwa pumbwa omakwafo opaulumomumbwe.
Efimbo a ya meenghundafana naKundana, Ngula okwa ti efolo laye wokongeleka okwa fiya po olukalwa lavo odula yadja ko muAguste ndele fiyo onena eli ina alukila keumbo.Ngula okwa ti vo neefolo waye aveshe okwa li ovalongifikola posikola yepedu, ashike ove lipendjelifa diva moilonga mo2022. “Omukulukadi wange eshi a ya okwa fiya a pata eenduda dihapu meumbo, mwa kwatelwa nelimba, kokaanda nako okwa li a pata ko nekumba ashike ekumba onde ke li teya po kokuhe na nghene,” Ngula ta ti.
Ngula okwa ti okwa ninga efimbo ta hupu shokadila nota mono ashike omakwafo movashiinda ngeenge tashi ya koikulya noshikundu.
Okwa ti meumbo paife oku li mo ashike novanailonga voumati Ouangola vavali ovo tave mu telekele, eembwa nhee neexuxwa. Okwa weda ko ta ti iha kofa nawa monduda molwa ta diladila oinima ihapu yonghalamwenyo nokuwete omadiladilo aye kae li vali ponhele noke na vali ombili yokomwenyo.
“Nonande ndi na etuwa ondi na oumbada wokweeta oshiponga mopate efiku limwe, shaashi onghalamwenyo yange kai li vali melandulafano, ohandi longifa omalodu sha pitilila,” ta ti. Ngula okwa ti itadulu okweeta omukulukadi umwe molwaashi ohombo yavo inai teka pambelewa, ta ti ye ita dulu oku ke i teya molwaashi haye a dja mo meumbo .
Ngula okwa ti okwa konga omakwafo kopolifi oshoyo kombelewa hai ungaunga noinima yomomaumbo shi na sha noupyakadi ou eli muo kakele fiyo okonena inau kandulwa po. Ta ti komakwafo a pulwa okwa dja ashike omasheko ndele opuwo. Ngula nomukulukadi waye ove na ounona vane omo ati vahapu ovanashilonga mepangelo.
Peneyambeko* (Kali shi Edina laye loshili), omushiinda okwa koleka onghalo yaNgula tat i otai ende ya uka kowii, ta indile ovakulukadi ovahombolwa opo va fimaneke ovashamane vavo, nongeenge nee va mono kutya inava hala vali nava lekele nombili opo vaha teye po eenghalamwenyo dovashamane vavo.