KATIMA MULILO – Bayahi babapila mwalibaka zetibiswa kimezi amuunda mwasikiliti sa Zambezi, baelelizwe kututa kapilipili kufukuza kwalisinyehelo, mezi amuunda habonahala kunanuha. Mayemo amezi mwanuka ya Lyambai Labutanu nayemi fa 6.73m hakupanywa ni 2.66m kanako yeswana ñohola 

Labune mukopano one ubizizwe ki Katengo Kasikiliti sa Zambezi nofetuhile kuba wakwamukunda, kasamulaho bayemeli kuzwelela ofesi ya Ngambela wanaha, nebanyazize baetapili mwasikiliti sa Zambezi kakusafa lipiho hala mayemo amuunda mwasikiliti. Nebaize lipiho zene baboni neli feela zezwelela kwababihi bamakande ni sicaba bane bahasanya maswaniso famakepe asicaba.

Muyemeli wasilalanda sa Katima Mulilo ya Tolopo Kennedy Simasiku nakupile kuli baikambote kwamukunda kufumana tatululo. “Mwendi lulukulule babihi ba makande kuli lukandeke hande kuli seluswanezi kueza kisikamañi,” nekubulezi Simasiku.  Zeo nihalili cwalo linumwana kuzwelela ofesi ya Ngambela wanaha nelibihile kuli batisize matente amashumi asilezi, mamatiresi amashumi aketalizoho, mikotana yamupunga ili ma 40kg yelikana 9 000, ili ze neuzwi kinaha South Korea.

Muunda hauzwelapili kunanuha mezi ase ahasani mwabala upa wasikiliti sa Zambezi, mwasilalanda sa Kabbe ya Mbowela. Likolo zecwale ka Muzii, Nankuntwe, Namiyundu, Nsundwa, Mpukano, Kasika, Mbalasinte ni Ilivilivinzi lise lipotolohilwe kimezi amuunda.