Auleria Wakudumo
Omupresidente Netumbo Nandi-Ndaitwah pamwe novaleli vongudu yoAffirmative Repositioning (AR) ova kala omutumba onhomenawina opo va kundafane omaupyakadi a taalela oshilongo.
Eshi oshi li shimwe shomoinakuwanifwa yomupresidente okukundafana neengudu dopapolitika da yooloka okukundafana oinima ya fimana moshilongo. Omupedupresidente Lucia Witbooi, Omuprima woshilongo Elijah Ngurare osho yo oilyo yokabinete imwe oya li ya waimina omupresidente okuya meenghundafana edi nongudu yo-AR.
Ongudu yo-AR oya li ya kwatelwa komeho komuleli wayo Job Amupanda eshi ya li ya talela po eumbo lOpashiwana Etitano. Meenghundafana davo, ongudu yo-AR oya holola omaupyakadi a pumbwa okukandulwa po moshilongo ngaashi eyambulepo leliko loshilongo, epangelo liwa nokuxwaxwameka exumokomesho loshilongo moikondo yopaumwene osho yo yepangelo.
Amupanda okwa holola kutya eenghundafana pokati komutwe woshilongo neengudu dopapolitika dimwe okukundafana omaupyakadi oshilongo oshinima shiwa neenghono.
Okwa ti eenghundafana edi kadi fi ashike okupopya ile okufuula ovanhu mokupopya ndele eenghundafana odo da nuninwa okukandula po eemhumbwe doshilongo.
“Osha fimana okutwikila eenghundafana da tya ngaha pokati kepangelo novaleli veengudu dopapolitika opo ku nghonopekwe epangelo olo tali yandje ouwa kOvanamibia aveshe,” Amupanda ta holola ngaho.
Omupresidente okwa tambula ko ongudu yo-AR. Okwa ti eenghundafana edi oda fimana okutunga onakuiwa yaNamibia.
“Onde mu tambula ko meumbo lopashiwana. Edi eenghundafana odo ame opamwe nokabinete twa tala da fimana. Ongovahoololwaleli, atushe otu na oshinakuwanifwa shokulinyika komilungu opo tu lele oshiwana shetu nawa fye tu shi nanene koufikilo,” Omupresidente ta ti.
Oshivike sha dja ko, omupresidente okwa li a ya meenghundafana novaleli vongudu yoNamibia Economic Freedom Fighters (NEFF).