Auleria Wakudumo
ONGWEDIVA – Omushikingalo Drawer nedina la shivika nawa Nghelo YaMkwamani oo ha imbile oLoco Sounds ina fiya omunhu momutumba eshi a li ta imbi momaulikilo oipindi aNdangwa mOlomakaya.
Nghelo YaMkwamani okwa li ta mwenyeke pouvalelo wowina wa li wa unganekwa kelelo lodoolopa yaNdangwa nelalakano okuongela oshimaliwa shomaulikilo oupindi oo taa ka kala ko okudja mo 24 Apilili fiyo 2 Mai neudo.
Loco Sounds okwa shivika kuvahapu molweengalo davo dihapu odo da kufa ovanhu koipundi ngaashi ‘Oyendji, yinakulu yomapongo, darling nadikwao dihapu.
Nghelo Ya Mkwamani okwa li a mwenyeka engungo lovakwashiwana osho sha holoka molwaalu muhapu okuyambidida odoolopa yaNdangwa.
Oufiku ou okwa li wa fiya vahapu nenyanyu, tave linyenge vo tava imbile pamwe nomushikingalo. Vahapu ovo ova li navo tava holola oitalendi yavo, umwe oto hale kutya mutu navo ova li ve na okuninga ovashikingalo ile ovandaanisi navo. Eshi Nghelo YaMkwamani a ya komesho, ina fiya nande oumwe omutumba, ou ta nhuka, ou ta daanisa, ou ta imbi nomwaau ngaho ta kuwu onghuwo shaashi ehafo ola li ngambishi meumbo mwa tomwa.
Molwoshitalendi shaye, Nghelo Ya Mkwamani okwa kufa novanenenhu momutumba. Omupedupresidente Lucia Witbooi opamwe nangoloneya woshitukulwa shaShana Hofni Iipinge nelelo lodoolopa yaNdangwa ova li va waimina omushikingalo mondabo omo va li tava saka moshili nokulikufa eengonyoto momaulu.
Omushikingalo okwa li a nyanyuda ovalanduli vaye neengalo ngaashi, Oyendji, Bar L ady nadikwao. Nonande eengalo da shikwa nale, odi li mopula natango osho tashi holola kutya oshitalendi oshi li mohonde.