ONDANGWA – Ovanhu omu-12 mwa kwatelwa eendokotola nhatu, ovapangi osho yo ovanambelewa tava longele koipangelo ova kwatwa po eshi vati va longifa omukalo woumbudi okukengelela oshiwana omiliona N$1,9 okupitila mehangano loSanlam. Omhangu yaNdangwa oya popya kutya ovatamenekwa ava ova longifa omukalo woumbudi okukengelela nokushangifa ovanhu mehangano lomakwashipaleko loSanlam tava longifa omikanda doipupulu ndele tava pewa ko oshimaliwa shomiliona N$1,9.

Ovatamanekwa ove litopolela oshimaliwa osho va kengelela paumbudi.

Ova holoka momhangu yaNdangwa Omaandaxa ashike ovatamanekwa vahamano ova pewa omhito yokulifutila mo modolongo noshimaliwa N$250 000 keshe umwe.

Omukundokotola Fillemon Nakanduungile, Abner Matheus osho yo Shikwaya Petrus natango ove li moshibofa shedipawo lomweeti woihokolola Justine Shiweda.

Ovalumenhu ava vatatu ove li va taalela okupangulilwa oibofa ivali, shotete shefyo laShiweda osho yo okukengelela oshiwana oshimaliwa. 

Ovatamanekwa vakwao ovo Festus Amwaalwa weedula 36 omupangi kOnandjokwe, Klaudia Martin weedula 34, Israel Shikongo weedula 30, Carlos Varela weedula 49 omundokotola kOnandjokwe, Kelsey Kudumo weedula 32 omundokotola kOnandjokwe, Ottilie Johannes weedula 34 omupangi kOnandjokwe, Katsilwa Josua weedula 36 omupangi kOnandjokwe, Julia Jesica Shaambo weedula 40 omunambelwa koshipangelo shakula kOshakati, naMartha Tautunyenge Eliphas weedula 36 omupangi kOnandjokwe.

Oshibofa shavo osha undulilwa komafiku 17 Septemba 2026 nelalakano lokuninga omakonakono omoule. Ovatamanekwa ovo va pewa omhito yokulifutila mo modolongo ovo Israel Shikongo, Ottilie Johannes, Katsilwa Josua, Julia Jessica Shaambo, Martha Eliphas naKlaudia Martin. Ovatamenekwa vamwe inava pewa omhito yokulifutila mo modolongo.

Omhangu oya lombwela ovatamanekwa ovo va pewa omhito yokulifutila mo modolongo opo va kale tave lilopota koitaashi yopolifi i li popepi navo Etitano keshe okudja potundi 08h00 fiyo 17h00.

Efiku tuu olo natango ovatamanekwa ngaashi Fillemon Nakanduungile, Abner Mateus, Petrus Uusiku, Petrus Shikwaya, Lukas Nekwiyu ova holoka momhangu mekwatafano loshibofa shefyo laJustine Shiweda.

Shiweda ou kwa li ta longele momhangu yaNdangwa okwa xulifa neudo koshipangelo koWindhoek konima eshi a kala a tambulilwa meembete. Okwa ponokelwa omudo wa dja ko omwedi Octoba pefimbo kwa li a hangika motuwa yaye peumbo.

Omhangu oya popya kutya Shiweda okwa ya shwa lwoikando iheyali ndele ta tilwa omeva e na oudio kolutu.

Oshibofa eshi osha undulilwa komafiku 8 April 2026 nelalakano lokuninga omakonakono osho yo va ninge omaindilo eehaende.

Ovatamanekwa ngaashi Fillemon Nakandukile, Abner Mateus, Petrus Uusiku naPetrus Shikwaya ove li kodolongo koGrootfontein.

Lukas Nekwiyu oku li modolongo kOluno.

Omutamanekwa umwe Nghilifavali Johannes ka kwa li a holoka komhangu molwashi oku li kodolongo koWindhoek.

Pefimbo ovatamanekwa tava ende va uka momhangu, omumwainakadona waJustine Shiweda okwa tameka okukwena a nyika oluhodi.

Oshiwana okwa li sha holoka momwalu muhapu komhangu sheya okupwiliki oihokolola ei.

-fhamalwa@nepc.com.na