ONGWEDIVA – Okwa lopotwa omukeleli womaliko omulumenhu a ponokelwa kookalyamupombo ndele ta dipawa pefimbo a hangika e li moilonga oufiku. 

Oshiningwanima osha ningwa oshivike sha dja ko mOngwediva ponhele yedina Scrap, hapa longwa oitenda. 

Nakufya okwa tongololwa oye Gotlieb Hangula Ndaumbwa weedula 36. 

Omukulunhu wopolifi moshitukulwa shaShana Commissioner Naftal Sakaria okwa koleka oshiningwanima eshi. 

Opolifi oya hokolola tai ti olutu lomulumenhu ou ole lituwa efiku la landula ko kovanailonga hava longo ponhele opo. 

Otaku hokololwa kutya okwe lituwa e li mekungu lohonde e na oipute komutwe nomedimo. Opolifi oya hokolola kouyelele wa monika otashi ulike kutya omulumenhu ou okwa dipawa kookalyamupombo. 

Otaku hokololwa efiku olo petungo opo kwa li ta pa longele Ndaumbwa pa vakwa oinima ngaashi o-TV, okashina kokundjeneka oikulya, omakumbafa avali, noshimaliwa keemuma shi fike poN$1 570. 

Oinima aishe ya vakwa oi li pongushu yoshimaliwa N$17 270. 

Opolifi otai indile moshiwana kwaau e na ouyelele kombinga yookalyamupombo ava opo shi lopotele opolifi keshe i li popepi. 

-fhamalwa@nepc.com.na