Iuze Mukube

Muzeko waGrant Cloete ni Richard Milinga, babanyaziwa kabulyangelino bwamasheleñi afitelela bolule babalalu (N$3.2 million) hala sitangu samutano wabuima bwalimotikala, ulibelezi keto yayomuhulu wabazekisi bamubuso Martha Imalwa. 

Cloete, ili mubeleki wakampani yezwelela naha South Africa yebona zabuima bwalimotikala, ni yanyazwa ni yena, muzamaisi mwakampani yebona zakuyaha mikwakwa mwanaha yezibahala kaRoads Authority (RA), batalimana ni mulatu wabulyangelino, ni mulatu okona kukambekwa wabusholi.

Milatu yeo izwelela kwabulyangelino bwakunyatela tifo yamasheleñi alikana bolule babalalu, ili bwamapampili ane asupeza kuli libyana neli amuhezwi inge kusicwalo. Bababeli nebatamilwe ñohola kasamulaho apatisiso kikatengo kakalwanisa zabulyangelino, teñi mwapatisiso, katengo neka yangwezi libyana zamasheleñi afitelela bolule bababeli, zengunganywa kuzeneswanela kuya kwamutano wabuima bwalimotikala.

Lipiho zakhuta libonisa kuli la 8 Lungu 2025 kwakampani yebona zamikwakwa mwaWindoko, kukulubelwa kuli babanyaziwa kabupumi ni mulelo wabuputeleli, nebaipitisize kuli nebafile kampani yebona zamikwakwa masheleñi amusebezi one uezizwe. Bakeñisa likezo zabuhata zeo, babanyaziwa nebakolwisize kampani yebona zamikwkawa kueza sesiñwi, nikutisa sinyehelo yamasheleñi alikana N$3 268 062.60. 

Bababeli nebalumelezwi kulifa masheleñi akulibelela muzeko wabona kwande, mi taba neisizwe la 20 Muyana 2026, kulibelela keto yayomuhulu wabazekisi. Keto yeo ikafa taelo kana taba ika zekelwa mwaKhuta Yepahami kapa mwakhuta yeswana, nikuli kimilatu ifi yebaswanela kuzekisezwa.