OSHAKATI – Omulumentu gwomimvo 33 okwa hulitha anuwa konima a lyatwa kololi yokututa omavi oshiwike sha zi ko, sho anuwa i iyumbile mopate e ta nyanyuka po thiluthilu.

Omugandji gomauyelele omukuluntu gopolisi moshitopolwa shaShana Thomas Aiyambo okwa ti oshiningwanima shoka osha ningilwa polukanda Oneshila mOshakati.

Otaku hokololwa kutya omulumentu ngoka okwa li a zi pehala mpoka kwa li taya dhana uudayisa, e ta lika po. Anuwa okwa li a kwatitha po oongodhi tango osho wo etemba lyohauto sho a lika po, niinima ayihe kumwe oyi na ongushu N$6 000.

Opolisi oya hokolola kutya omulumentu ngoka anuwa sho a zi pehala mpoka, okwa ende u uka kopate nokwa li i iyumbule mopate omanga taku zi eloli lyomavi.

Sha ikolelela kuuyelele waamboka ya li poshiningwanima, oya hokolola kutya omulumentu ngoka okwa kala ta ende kooha dhopate nokwa li i iyumbile mopate omanga eloli tali hingililwa.

Olutu lwe anuwa okwa li lwa nyanyuka po, niipambu yolutu okwa li ya halakana nopate.

Uundayisa otau dhana onkandala unene mondoolopa yaShakati. 

Moshiningwanima shimwe natango omulumentu gwomimvo 32, anuwa okwa li a futitha aakuluntu ye oshimaliwa N$30 000 sho kwa li a kwatitha po ohauto yaakuluntu yo-GD6 sho a lika po kuundayisa.

Ngoka a li a kwata ko ohauto okwa li a ndjiki oonyala mevi kutya ita gandja ohauto ndjoka omanga inaa pewa oshimaliwa she.

Aakuluntu oya li ya futu N$30 000 ndjoka, opo ya mone ohauto yawo.

Iiningwanima iikumithi ohayi ningwa okuza pomaudhano guundayisa, yamwe taya lika po noku gandja po iinima yawo yongushu ngaashi omagumbo, oohauto nosho tuu.

-vkaapanda@nepc.com.na