Uulalelo wokugongela oshimaliwa shomauliko giipindi konooli wa gongele oshimaliwa sha thika poomilliona N$3, 500, 000 moondoolopa dha yooloka. 

Oshimaliwa shimwe osha gongelwa momwedhi gwa zi ko omanga omaulalelo gamwe ga ningwa mehuulilo shiwike. 

Omauliko giipindi ngoka ga gongele oshimaliwa shoka ongaashi, omauliko gomazimo noshimaliwa sha pita N$800 000, omauliko giipindi gOpuwo N$800 000, omaluliko giipindi gOndangwa noshimaliwa sha pita N$800 000, omauliko gOmagongo N$600 000 osho wo Omaludi ngoka ga gongele oshimaliwa a ngala sha thika N$500 000. 

Oshimaliwa shoka ohashi gongelwa okuyambidhidha elongekindho lyomauliko giipindi nomayakulo ga yooloka opo ayihe yi vule okuya pomahala. 

Omuprima gwoshilongo Elijah Ngurare Etitano sho kwali taku gongelwa oshimaliwa shoku longekidha oshituthi shOmagongo kOnamega, okwa popi kutya aluhe ngele taku ningwa iituthi yontumbo yehafo, ngaashi shika tashi unganekwa shOmagongo, oohango, omavalo, omashasho no sho tuu, aawambo ohaya dhungu ohaya longekidha omagongo noku dhunga omalovu giilya, onga omuthigululwakalo. 

Ta fatulula kutya omuthigululwakalo ogo omaukwatya gomuhoko gontumba, gwi ikwatelela kelaka, eitaalo nomayihumbato gawo, iikunwa, iikulya, omizalo, iiyimbo, nosho tuu. “Oshituthi shika tashi ka ningwa momasiku 24 Mei nuumvo, otashi ka kala oshinene nosha simana sho oshoka tashi longekidhwa ngiika opo ayihe yi kale yili pomahala. Nguka ogo omukalo goku kaleka po omuthigululwakalo, opo wo oshilongo shetu nasho shi kale shina omulilo goku tugamena,” ta fatulula ngaaka. 

Elenga enene lyUukwambi osho wo omunashipundi gwomalelo gopamuthigululwakalo gokonooli Herman Ndilimani Iipumbu okwa ti shika otashi ka kala oshikando oshitiyali elelo lyUukwambi tali unganeke oshituthi shomagongo. 

Ta ti, oshiindingili shoka otashi ka kala ko muMai kOnamega, hoka taku ka holoka aaleli aakuluntu, aaleli yopamuthigululwakalo , aanangeshefa yoondondo dha yooloka osho wo oshigwana. “Oshituthi shomagongo ohashi yakulwa komalelo agehe gahetatu gomuhoko gwAawambo kuumbangalantu woshilongo, ngaashi lyUukwaluudhi, Ondonga, Oukwanyama, Ongandjera, Ombalantu, Uukolonkadhi, Uukwambi osho wo lyaMbadja,” ta ti ngaaka. Iipumbu okwa ti, ngaashi shi li onkalondjiigilile, oshituthi shonuumvo osha longekidhilwa owina sho shi hambelele nokutanga omagongo ongoshikunwa shAawambo. 

Ta fatulula kutya, oongongo mono omagongo haga kolwa osho wo mono iinima iikwawo hayi kuthwa ngaashi omahuku, odha talika ko ongoshilimbo shopaushitwe mono oonkalamwenyo dhaakalimo yokiitopolwa hoka dhi ikwatelela. 

“Aawambo ohaya mono oshindji okuza momuti gomugongo ngaashi omuzile, oshinwa, omagongo, odjove, oongongo osho wo iikuni,” Elenga enene lyUukwambi Iipumbu okwa ti ethimbo lyomagongo, pamuthigululwakalo gwOshiwambo, ihaku pangulwa oshoka anuwa otashi vulika omupogoli kaa li e hi sho tangi oshoka pamwe okwa li adhika a nwa. 

“Oompango ndhoka odha zi muuyuni wonale, onkene otwa tsikile nadho sigo onena ongesimaneko lyomuthigululwakalo gwetu,’’ Iipumbu ta popi ngaaka. 

Ta ti, oshoka omugongo ohagu kolwa ashike lumwe momvula okuza momwedhi gwaFebuluali, nongele wa kuka opowo ano oha pu piti ethimbo ele inaagu nuwa. 

“Omagongo oga kala ogo ashike oshikolitha monakuziwa, onkene opwa tulwa oompango kutya itaku endwa niilwitho oshoka ngele aantu ya nu ya pitilila otaya pogola. Ndyoka olyo etompelo aantu ihaaya pangulwa ethimbo lyongongola, iihokolola ohayi tameke muApiilili,’’ ta popi ngaaka. 

Okwa gandja oshiholelwa kutya uuna omukiintu a pewa enkawa megumbo pethimbo lyomagongo komusamane, kali ha pewa ombedhi oshoka otaku fekelwa a nwa ongongola. 

vkaapanda@nepc.com.na