Abraham Mwanyekange 

Ovalandifi vomomapandaanda ova dika eenyala medu nova holola kutya itava di mo momapandaanda nonande va pewa elombwelo opo va kale va yela mo Etitano loshivike sha dja ko. 

Umwe womovalandifi Mirjam Nghuumbwa oo a landifile komesho yokamini koRani Group okwa holola kutya kena apa taka xupila. 

Onda ninga po eedula 10 paife apa. Paife nandi dje po ndika landifile peni pena ovalandi,” ta pula ngaho. 

Nghuumbwa okwa ti komatala ita iko shaashi kaku na ovalandi ovo hava lange oilangifomwa yaye. Okwa ti mwene wokamini kena oupyakadi navo onghene nava efwe va landifile ashike pomunghulo opo va kala nale hava landifile oule weedula da ya. 

Mukwao umwe vali Mari Ndunge weedula 63 oo ha landifile pokakilinika pEluwa okwa holola yo kutya ita dipo pokakilinika molwaashi elelo ola dopa okuva shiivifila pefimbo. 

“Ovanhu ngeno ohava ningi nee oshuufanene ndele tave tu lombwele nawa. Ito dulu ashike okutya mongula kaleni mwa yela mo momapandaanda ngeenge hasho ohatu kemu kufa mo nopolifi, kashiko,” Ndunge ta holola nehandu. Ndunge okwa ti ye ota landifa kwaavo ita va dulu okufika komatala oo eli kokule nomaendelo ovanhu. 

“Osha fimana opo alushe tu kale twa pewa omhito opo tu yandje omaliudo etu shi dulife ashike omunhu to tewa wafa ombwa, “ ta ti. Konima eshi va pewa elombwelo va fiye po omapandaanda, ovalandifi ova monika natango Omaandaxa tava twikile okulandifa momapandaanda. 

Omupopi l iko wodool opa yaNgwediva Ottlie Shingenge okwa lombwela Kundana ta ti inava dula okuya komesho noku kufamo ovalandifi momapandaanda. 

“Vamwe okwa li ve uya kombelewa yetu Etitano. Ove tupa omakemo avo. Paife ohatu ungaunga nomakemo avo, fyee tu dule okuninga etokolo lili mondjila,” Shingenge ta holola ngaho. 

Shingenge okwa ti ota va indile kovalandifi veli ufe kelombwelo opo va djemo momapandaanda vo va kalandilfile keenhele oko tava tulwa molwaashi okuna eameno lili nawa. Omunambelewa womidingonoko noundjolowele melelo lodoolopa laNgwediva Penda Kashihakumwa okwa ti mopaife oshivike eshi ova tameka okuninga omaongo. 

“Oha tu ende hatu udifa ko ovalandifi vetu kutya omolwa shike sha fimana okudja momapandaanda noku ya konhele oku kuli nawa. Vahapu ove udite ko nova itavela okudjamo,” ta ti. 

Kashihakumwa okwa ti ina va hala okulongifa ovakwatelipo voveta oku kufa mo ovanhu momapandaanda. 

“Ondi wete elongo eli hatu yandje ola wana nEtitano loshivike eshi olo laxuuninwa. Naau nee taka kala ta anyene mo ohatu ka tala kutya ohatu ka longa naye ngahelipi,” Kashihakumwa ta holola ngaho. 

Okwa ti elelo lodoolopa olina po nale eenhele dili nhee modoolopa oko taku ka landifilwa kwaavo tava di momapandaanda. 

-amwanyekange@nepc.com.na