Minista gwiikwafambilika, oomina niikwankondo Mondestus Amutse, okwa pititha ohela kutya omahooli oga gwedhelwa okupendukila nena. Sha ikolela komushangwa gwa pitithwa, omahooli agehe oga gwedhelwa, opetolola oya gwedhelwa N$1.40 molita, omanga odissela ya londo sigo N$4.63. “Otandi kumagidha oshigwna shaa mbandale noku tula omahooli miikwatelwa, ihe nashi nwethe ashike shuukitha moohauto dhawo,” ta kumagidha ngaaka. 

Sha ikolela kuuyelele wa li wa pitithwa kuuministeli wiikwamina omahooli oga kala nokulonda molwaashoka oondando dhomahooli inaaga dhindwa nadho odha kala nokulonda koEurope, hoka kwa ikwatelela omatokolo gelundululuko lyomahooli. 

“Opo uupyakadhi mbuka wu kandulwe po, otashi pula iilongo yaAfrica okumanga uukumwe kumwe okudhinda nokukondolola eyete po lyomahooli shoka tashi ka pula oobiliona ondhindji,’’ ya fatulula ngaaka.

Ya gwedha po kutya etokolo ndyoka kali shi epu no ita li ningwa pethimbo limwe, ihe ota li ka kwathela egwo pevi lyongushu yondando yomahooli.

Omwedhi gwa zi ko omahooli okwali natango ga gwedhelwa, sho opetolola yali ya gwedhelwa N$2.50 omanga odissela yali ya londo sigo N$4.00 molita.

Egwedhelo ndyoka okwa li lya manitha mo omahooli mootenga moshilongo, sho omahala gokunwitha omahooli moshilongo gali ga kankama manga okulonga, ashike esiku lya landula ootenga okwali dha mono omahooli.

Shika osha li sha uvitha nayi aahingi yoohauto, sho ya kala taya nyenyeta okupitila komalungula osho wo miikundaneki ya yooloka kutya oshike epangelo itaali gwanitha po shoka shina okuningwa opo ku kandulwe uupyakadhi womahooli. 

“Oshike tu na okumona iihuna komahooli. Oshike epangelo lya nyengwa okukandula po uupyakadhi mboka tau thimininike oshigwana,” taya pula ngaaka.

Taya ti komasiku gokomeho itaya ka hinga we oohauto oshoka kaye wete uupyakadhi mbuka tau ka hula. 

Epangelo lyaNamibia olya kala nokukwashilipaleka kutya Namibia olyili metifa okutula miilonga ekandulepo lyuupyakandhi womahooli wa taalela oshilongo. 

vkaapanda@nepc.com.na