Omulumentu gwomimvo 30 okwa mangwa po kopolisi moshitopolwa shaShana sho anuwa a dhipaga yinakulu omolwa omona gwomumati, hekulu ya nakufekelwa anuwa ena oondjo dhe.
Oshiningwanima shoka osha ningwa Etitano, lwopotundi 02h00 momukunda Ondiyamande moshitopolwa shaShana.
Sha ikolelela kuuyelele wa gandja kopolisi, nakufekelwa okwa patulilwa oshipotha shedhipago, okuetekela edhipago, etoyo lyegumbo nuufuthi.
Ota ku hokololwa kutya omulumentu ngoka anuwa okwali a tatula ekende lyondunda ya yinakulu, eta piti aye meni.
Okwali anuwa a tameke okudhenga omukulupe opamwe nokatekulu ke komimvo ne, oshoka anuwa omona gwomumati okuna oondjo dhe.
Omukulupe okwa hulitha ethimbo ndyoka. Naku fekelwa okwali a dhengele hekulu ngoka anuwa ena oondjo dhe, kutya okwa dhipaga yina.
Naku fekelwa okwali a matuka po, afaalela ongodhi yomukulupe.
Opolisi oya ti hekulu okwali a dhengele omukiintu gumwe ongodhi ngoka ali megumbo a pule ngele dhoka a lombwelwa odho shili ngaa, sho ayi kondunda yomukulupe okwaadha omukulupe eli metoko lyombinzi, a hulitha nale.
Okanona okali ka ka mona uuhaku, ashike okeli monkalo yili hwepo.
Naku fekelwa okwa kala ta kongwa kopolisi oku za esiku lyoshiningwanima no kwali a mangwa Olyomakaya.
Otaku hokololwa kutya okwa li ta kambadhala okulefa otakisi sho kwali a dhimbululwa komupolisi gumwe ngoka a li keli miilonga pethimbo, eta lopotele aanambelewa aakwawo.
Naku fekelwa ota holoka nena mompangu.