Mulisa Simiyasa 

OTJIWARONGO – Kopano ya Independent Patriots for Change (IPC) Labubeli nenyazize katata kezo yekulubelwa yakukunupa muuna walilimo zemashumi amalalu kazelobañwi, yakulubelwa kuli nakula butuku bwakutakana kwa Otjiwarongo. Nyandi nazibahalizwe kuba Bertold Mwaafa Nakangombe kuzwelela sikiliti sa Oshana. 

Kopano ya IPC, mwaliñusa lene lifilwe kwababihi bamakande, neize likakalezo zalifu la Nakangombe litaha kanako lipilaelo zasicaba hala situhu sa mapokola lizwelapili kuhula. “Nyandi nesi mukwenuheli, sibangoki kapa sila, kono muyahi wanaha yanakula butuku bwa munahano mi natokwa milyani. Kacwalo, IPC inyaza kubulaiwa kwahae hahulu luli,” nekubaleha liñusa.

Kopano ya IPC ibata kuli kuezwe patisiso kapilipili hala kezo yeo nikuli sicaba silemuswe patalaza kuli nekuezaheziñi. IPC neekelize kuli: Nako itile naha Namibia ibe ni ofesi ye ikemezi yetalima zalipilaelo kuamana ni mapokola, ili yekaba ye ikemezi, yena ni maata aku amuhela lipilaelo zasicaba, kokubatisiswa mikwa yabona yekulubelwa yakuloba mulao ni kufa likelezo haiba kunani babaswanela kuzekisiwa.

Kopano yelwanisana hape neize hakinto yelukela kuli mapokola babatisise taba yeo, kakuli kuibatisisa kikuisileleza bona beñi. Muetapili walitaba zasicaba mwasipokola mwasikiliti sa Otjozondjupa Maureen Mbeha, naize Nakangombe ukulubelwa kuli nakunupilwe nikubulaiwa kanako ya 08h30 Lamubulo kakusasana, kasamulaho piho kuzwelela kwasicaba kuli nasweli kungundunganya fasiteshini fokukwelelwa limotikala asweli sabule.

Mbeha naize sikwata samapokola neba alabezi kwateni mi bayofumana Nakangombe asweli sabule, inge afumbela limembala zasicaba. Kayona nako yeo, kukulubelwa kuli muuna yoo asutelela mupokola yomuñwi fakaufi inge asweli kuloza sabule, kamulelo wakubata kumulela. 

“Mupokola asuta mwamulaho mi akunupa tobolo yahae yamufuta waR5, mi amukunupela mwatoho,” nekubulezi Mbeha. Nyandi awela fafasi, mi naisizwe kwasipatela samubuso sa Otjiwarongo kone ailo timelela. Mupokola hasika tamiwa kale, lipatisiso halinze lizwelapili. 

-Nampa