Omulumenhu weedula 30 okwa tetaula nokudipaa xekulu weedula 94 nekatana, nokumonifa ondenge oshiponga.
Oshiningwanima eshi osha ningwa mEtivali momukunda Onekwaya West, moshikandjohoololo shaNdola, moshitukulwa shaHangwena efimbo longula.
Otaku hokololwa omufekelwa oo taku diladilwa kutya okwa li koshi yoingangamwifi a hokolola kutya okwa ponokela ovakwapata vaye molwaashi vati ta fekele kutya ove mu tulila oudio mombelela yoshingulu.
Nakufya okwa tongololwa oye Josua Kirus Hishongwa omukalimo womomukunda Onekwaya West.
Omupopiliko wopolifi moshitukulwa shaHangwena, Warrant Andreas Nghiyolwa okwa hokolola ta ti omufekelwa okwa tameka okutanguna kutya okwa pewa ombelela ya tulwa oudio nokudja opo okwa kufa outa waNangongo ndele ta yashe ondenge yeedula 17.
Opolifi oya hokolola tai ti omufekelwa okwa kufa natango ekatana ndele ta tete xekulu momutwe lwoikando ya yooloka.
Omukulupe ou opo a xulifila ponhele opo noshiningwanima eshi osha tilifa ovashiinda.
Opolifi oya hokolola tai ti nakumonifwa oshiponga okwa faduka po a uka mepya.
Otaku hokololwa kutya okamatyona oka ka hondama mokapangelo ke li popepi neumbo lavo.
Omufekelwa okwa landula okamatyona mokapangelo ndele vati ta tatula omakende.
Nakuninga oshihakanwa okwa tambulilwa moshipangelo shaShakati ta mono epango noku li monghalo i li xwepo.
Omufekelwa okwa kwatwa po nomakonakono opolifi otaa twikile moshikumungu eshi.