Omulumenhu weedula 31 okwa fya eshi a tuwa nombele yokapi kukaume kaye Etivali lopotundi 21h20 kolukanda Opoto momukunda Onkaankaa moshitukulwa shaMusati.
Nakufya okwa tongolwa oye Joseph Ndaendongula omukwashiwana waAngola e li omulifi woimuna momukunda Onkaankaa.
Komufala wopolifi moshitukulwa shaMusati Commissioner Titus Shikongo okwa hokolola ta ti ovalumenhu aveshe ohava longo pomukunda opo onga ovalifi voimuna nova kala oukaume efimbo lile.
Ovalumenhu ova tameka okutanguna konima eshi nakuninga oshihakanwa vati a ula omufekelwa kutya ove na ondjala keumbo, voo vati ohava lile mumwe neembwa dambulavo.
Vati omufekelwa okwa uda nai eshi a ulwa kukaume kaye kutya eembwa davo ohadi lile mumwe novanhu, onghee okudja opo aveshe ova tameka va handuka ndele omufekelwa ta tameka okudenga mukwao nenghava moshipala.
Opolifi oya hokolola tai ti konima eshi nakufya a dengwa nenghava okwa tameka okuumba eengonyo naye.
Omufekelwa okwa kufa mo ombele yokapi ndele ta tu kaume kaye loshikando shimwe meemhati fiyo ta xulifile ponhele opo.
Ovakwapata vanakufya ova shivifilwa efyo laye nomakonakono opolifi otaa twikile.
Opolifi oya kunghulila oshiwana opo shi xulife po okukala tashi ende noilwiifo mokati kovanhu shaashi osha nyika oshiponga neenghono.
– fhamalwa@nepc.com.na