Omunafaalama gwiikwamboga oshowo iikwamawawa Soini Natangwe gwomoshitopolwa shaMusati, okwa hokolola nkene a thigipo iilonga ye, alandule ondjila yuunafalama.
“Onda ningi omimvo heyali tandi landitha mondingosho, moka kwali handi peya N$800 komwedhi, ihe ondali nda ndhimbulula kutya iimaliwa mbyoka kayina esiku yika gwane, okuhupitha ndje oshowo aakwanezimo yandje,” ta hokolola. Ta ti, okwali ashuna kegumbo, noku tameka oshikunino mepya lya meme gwe, nokamaliwa hoka a li agongele.
“Otandi pandula oshoka ka ndina oondjo dha sha ka kwali nda pewa omukuli. Oshikunino shandje onde shi tameke nokashono ndali ndina nonando ka kwali ka gwana. Onda kala nokumona omayambindhindho mpeya naa mpeya,” ta ti ngaaka.
Natangwe okwali a hokolola kutya ohamono iiyemo okuza mongeshefa ye yiikwamboga noyi kwamawawa, yi vule oshimaliwa kwali ha peya mondingosho, iikando omilongo mbali. Ta gwedhapo ta ti, nonando ongaaka, okuna omaupyakandhi ngoka haga shunitha oshikunino she monima. “Oshikunino ohashi vulu okuponekelwa kuupuka, mboka hauvulu okuhalakanitha po oshikunino, shoka sha shololitha aanafalama yiikwamboga oyendji,’’ ta fatulula ngaaka. Ta ti, ka pena iilonga kayina uupyakandhi, onkene omolwa inaahala okuguma iinima yaantu, ineeyi pitikilwa, okuna okulonga sigo aluhe. “Natangwe moshikunino she omuna, oomboga ndhomalundhi ageshe, omanyangwa, uunawamundesha, omanuwa, onyanga nomatama niikwawo oyindji. Ta ti, ondjila ye yo kuya kositola okukalanda iikulya oyaninga ohupi, oshoka iikulya oyindji otayi zi moshikunino she.
Tagwedhapo ta ti, natango okuna oshikuku shoondjuhwa, shoka paife shina ondjuhwa 200.
“Oondjuhwa odha ningi ethimbo ndhina ongeshefa tayi shongola, omolwa iituthi mbyoka ya li ya kalekwa molwa omukithi gwoCovid-19,” ta ti ngaaka. Natangwe ta ti, okuna omukumo kutya omanga iituthi tayi tsikile, ongeshefa ye yoondjuhwa onayi keenda nawa. “Otandi kumagidha aanyasha, kutya oshimaliwa oshili muunafalama. Ngele owa tameke ongeshefa yuunafalama, ito hala we iilonga yo komwendhi oshoka owa ningi omuhona kungoye mwene,” ta kumagindha ngaaka.
Ta ti, ngoka ta nyengwa nathike pookansela dhawo, etaya pula omauyelele nkene yena okumona omikuli, okuyapo nooproyeka dhawo.