TSANDI – Ombelewa yangoloneya waHangwena oya tungila omukulupe e na oulema onduda yokunangala konima eshi onduda yaye ya pepwa oipaleki kondula. 

Onduda oya tungwa i na okandjuwo meni, nokalikoshelo. 

Onduda oya pepwa po komhepo omudo 2023 nokudja opo mwene weumbo Lucia Petrus okwa tembukila keumbo lamumwaina. 

Ngoloneya woshitukulwa shaHangwena Kadiva Hamutumwa onghela okwa ya dja onduda ei pambelewa onghela komukunda Tsandi, moshikandjohoololo shaNdobe. 

Okwa popya ta ti ombelewa yaye otai twikile okuyambidida ovanhu ve li moluhepo unene ovakulupe novanhu ve na oulema. 

Hamutumwa okwa pula ookansela koikandjohoololo ya yooloka opo va twikile okushivifila ombelewa yaye ngeenge va didilika oshiwana sha pumbwa omakwafo. 

“Konima eshi kansela woshikandjohololo shaNdobe a shivifila ombelewa yange. 

Ombelewa oya tula poshitafula oshimaliwa shokutungila omukulupe ou onduda,” ta ti. 

Ngoloneya okwa ti onduda oya tungwa kovanyasha va dja moshikandjohoololo shaNdobe. 

“Elalakano okuyandja omhito doilonga kovanyasha va dja moshikandjohoololo eshi,” ta ti. 

Okwa weda po ta ti eedopi nado oda folomwa kovanyasha tuu ava. 

Ngoloneya okwa pandula kansela woshikandjohololo shaNdobe Helaria Ndjuuluwa eshi ta twikile okulonga nelitulemo okuyandjaneka omayakulo koshiwana. 

Nakutungilwa onduda, Lucia Petrus okwa holola olupandu laye eshi a tungilwa onduda yaye. 

“Onda pandula unene ngoloneya wetu woshitukulwa shaHangwena eshi e na oshisho noshiwana. 

Twikila okuyambidida vakwetu ovo ve li monghalo ya fa yange,” 

Okwa hokolola ta ti oha kala ashike e li kokatemba molwaashi okwa lemana momudo 1981 pefimbo kwa li a tandwa. 

Ovanyasha ovo kwa li va mona omhito yokutungila mekulu Lucia onduda ova pandula ngoloneya waHangwena eshi e va pa omhito yoilonga. 

-fhamalwa@nepc.com.na