Okwa li ethimbo lyoshitumbetango sho aantu mboka ya tembudhwa komalukalwa gawo ya falwa kootenda kEhenye mOshakati, kwa li taya tula po oshuumbululwa omanga yamwe taya yogo nuunona tau tondoka wu uvite ombili pomagumbo gawo gopakathimbo.
Aakalimo mboka ya tembudhwa kolukanda Oshoopala ngashiingeyi ye vule 300, oya li ya holola enyanyu nolupandu komayambidhidho ya ningilwa kepangelo oshowo kelelo lyondoolopa yaShakati omanga yamwe ya kumagidha yakwawo.
Martha Malakia ngoka pethimbo ndyoka kwa li ta yogo oonguwo dhe okwa kumagidha mboka ye li mekwatathano lyopahole ye li mootenda, ya simaneke wo kutya oye li mo naanona, ta ti ethimbo ndyoka ye li mo, otali vulu oku indhindhimikilwa.
Ta ti, inaya kala ashike ya manguluka, oshoka aanona yamwe aashona.
Ta gwedha ko ta ti, omalapi ngoka ga topola oondunda dhopakathimbo kage shi omiinekelwa, natango haayehe ya topola ko aanona. Malakia okwa ti, sho ta popi ngaaka natango okwa kwatela mo wo omahepeko goomeme oshowo iiningwanima iiwinayi hayi vulu okuholoka oshowo okuningwa kaakuluntu.
Okwa indile wo natango aantu ye li mootenda opo ya tsikile nombepo ndjoka ye ya po nayo.
“Oyendji ohaya ihumbata nawa petameko, ihe konima yomasiku oto ka mona ya kanitha omikalo, no uteya po oompango dha tulwa po,” ta popi ngaaka.
Ta kumagidha yakwawo kutya naya kaleke ehala ndyoka lya yela ngaashi naanaa lyi li ngashiingeyi.
Ta gwedha ko ta ti uuyogoki nau pangele, oshowo mboka ye na uunona naye wu kumagidhe opo kau nigilike ehala.
Oyendji okwa li ya gandja omaiyuvo gawo, taya ti onkalo yonuumvo ombwaanawa okuyelekanitha nomimvo dha piti sho aantu kwa li haya tulwa motenda yimwe kaape na shoka sha topola ko omagumbo, nenge oondunda dhokulala.
Susana Uusiku ngoka a li a adhika opo ta penduka mondunda ye yokulala okwa ti, motenda yawo ina tsakaneka mo uupyakan dhi natango. “Otu li mo ashike aakiintu naanona, ashike ope na omalapi ga topola pokati. Aakuluntu oya ikalekelwa, kape na nando uupyakan dhi okukala motenda yimwe naanona oshoka omala oga topoka,” ta ti ngaaka.
Ta ti, nonando inaya za komagumbo gamwe yo inaya pambathana, elongelokumwe pokati kawo motenda sigo onena olyi li nawa.
Uusiku okwa pandula wo natango komayambidhidho ya pewa ngaashi iikulya oshowo iiyambidhidhwa yilwe.
“Iikuni oya kala uupyakadhi kutse, ngaashi naanaa wu wete kutya iishana oyu udha omeya, katu na mpoka tatu tyaya iikuni,” Foibe ngoka a li ta teleke ethimbo lyongula ta popi ngaaka.
Ta gwegwedha po ta ti, omutenya gwEtiyali okwa li ya mono omaloli getanga lyegameno ge ya okuya topolela iikuni. “Otatu pandula, enyanyu tu na kalyi shi kuyelekwa. Nonando twa thigi po omagumbo getu twe ya huno, katu li ko tatu mono iihuna,” ta pandula ngaaka.
Ta ti yakwawo yalwe koshitopolwa shaHangwena inaya gwanithilwapo ayehe ya yambidhidhwa nasho, onkene ota ti, yo aanelago.
vkaapanda@nepc.com.na