ONGWEDIVA-Aakiintu aagundjuka mboka ya kala noku landitha omalutu mOshakati oya nyanyukwa molwa ompito ndjoka ya pewa opo ya shune mosikola.
Aagundjuka mboka oya tambulilwa mosikola yi li mOshakati, moka taya ilongele okuhondja oonguwo dhayooloka. Moonkundathana noshifokundaneki shika, oya ti, oya kala ya tegelela oompito dholundhi nduka, opo ya ze mo muupika ya kala ya itula. Osenda ndyoka tayi gandja omalongo nomadhewo goku hondja oshowo okuhila mo aanyasha momapanda, oya totwa po komunyasha Frans Kapembe Nangaku tayi ithanwa “Atmos Fashion Design and Tailoring” yili mepandaanda enene lyOkandjangedi mOshakati moshitopolwa shaShana.
“Ondeya po noproyeka ndyika okuyambindhindha aanyasha ya taalela onkalo ondhigu omolwa omatompelo ga yooloka nonando oyendji oya totha mo okwaana iilonga,” ta hokola ngaaka.
Nangaku okwa ti, oproyeka ye okweyi nyolitha no yili kohi yuuministeli woka kwashikekookantu.
Ta ti, ngaashingeyi okwa pondola okunyolitha aalongwa yeli yatano okuza pontopa yokandjengedi mpoka ya kala noku shingitha omalutu gawo ya hupe. “Natango ota tu indile aanyasha yena ohokwe yoku mona uunongo wokuhondja ya thike posikola yetu,” ta po pi ngaaka.
Ta gwedha po kutya osikola yawo itayi pula oonzapo nenge o futu ya sha.
“Osikola yetu inayi patela aalumentu kondje,’’ ta ti ngaaka.
Nangaku okwa ti, omayakulo agehe posikola ohaga holoka noshimaliwa okuza mondjato ye.
“Ota tu indile wo natango omayambindhindho okuza moshigwana na kehe shoka opo tu humithe komeho osikola nokunyolitha aanyasha oyendji, ya ze mo momapandaanda,” ta indile ngaaka. Suzen Martin ogumwe gwo maalongwa yatano ya mono ompito okunyolithwa posikola yokuhondja.
“Ompito ndjika onda kala ndeyi tegelela, ihe ka kwali ndina mpoka tandi tameke oshoka kandina iiyemo yokwiifutila ngame osikola inandi yi mana, onkene otandi ithana onga omunelago,’’ ta po pi ngaaka.
Ta hokolola kutya okwa kala noku landitha olutu lwe pontopa yOkondjengedi, opo a vule okwihupitha. Martin okwa ti, ota kwata nawa ompito ndjika yaa gwemo momake ge oshoka iteke yi mona we.
“Itandi shuna ko we kontopa, inandi hala we okulanditha olutu lwandje oshoka onda hala okulongekidha onakuyiwa yaanona yandje, uuna nda mana osikila yandje,” ta hokolola ngaaka. Ndinelago Johannes ngoka naye a thigi po iilonga yokwiilanditha okwa ti, osikola hwe po.
“Otwa kala noku tula oonkalamwenyo dhetu moshiponga. Sho nda tseyithile aakwanezimo yandje kutya onda shuna kosikola osheya nyanyudha, taya ti otaya kwathandje mpoka ta pu pumbwa ekwatho,” ta po pi nenyanyu.
Johaness okwa gwedha po kutya, oya kala ashike taya imonitha iihuna yo yene, aakwanezimo oyali ye ya ekelahi omolwa onkalo ya kala muyo yokwiilanditha, ashike nani kayena uupyaandhi.