Omukuluntusikola posikola Onaushe Richard Kalola okwa ti aalongwa ye vule 300 posikola yawo oye li mompumbwe yomizalo dhosikola, unene pethimbo ndika lyuutalala.
Kundana okwa li a tsakanekwa kaalongwa posikola mpoka taya kekama kuutalala, omanga yamwe taya tondokele momutenya, ye li koompadhi dhowala omanga yamwe kaye na oombindja.
Richard okwa ti, onga aalongisikola oya kambadhala okuyambidhidha mpoka taya vulu, ihe inaya vula okugwanitha aalongwa ayehe posikola.
“Otandi indile natango, kaasinamutimahenda kehe ngoka ta vulu okuyambidhidha aalongwa yetu, taya si uutalala ye shi ninge owala. Ota tu pandula,” ta indile ngaaka.
Omulongwa gumwe e li mondondo ontiyali posikola mpoka, a li a yambidhidhwa a zale mondjakete yomutoolinkundana gumwe omanga etango tali yeluka okwa popi ta ti, ke na ongaaku oshowo ombindja.
Ta ti, ina zala oongaku oshoka ke na sha, nokegumbo kaku na iitapa nenge dhokongeleka sho osho shoka e ya oompadhi dhowala kosikola.
“Kandi na sha we omizalo dhimwe, ondi na ashike iikutu mbika nda zala yosikola. Otandi indile kehe ngoka ta vulu okukwathela ndje e na iikutu nando iikulu a tumine ndje, oshoka okwa talala,” taka indile, ko otaka kekama kuutalala.
Omanga taka hokolola okwa li ka tulwa momutenya opo ka mone oonte dhetango ka mone omwenyo, taka ti, oka thiga meme gwako megumbo, ihe oka zi mo inaaka lya oshoka kamu na iikulya.
“Omasiku gamwe ngele nda sa ondjala unene, ihandi ya ko kosikola, oshoka kosikola okokule okuza kaandjetu,” taka hokolola ngaaka.