Oosikola dhaanona ye na omaulema ga yooloka otadhi yalulwa unene miitopolwa yo ko nooli, ndhoka natango dha taalela omaupyakandhi ga yooloka.
Vicky Joel, okwa toto osikola yokuyambindhindha aanona mboka taya lumbu nuunkundi womuuluwi.
Osikola ndjoka yedhina “Circle of Hope” oyi li mOngwediva, posenda yongeleka yaElcin moshitopolwa shaShana.
Ta ti, omolwohole nesiloshimpwiyu e na, osha li she mu hingi sigo e ya po nosikola ndjoka oshoka aanona ya taalela uunkundi mboka ohaya pumbwa ohole yu udha, opo nayo taya kale ye na ombili.
“Uunona mboka owa taalela omaupyakadhi gokupopya oshowo onkalo yawo oya yooloka lela,” ta fatulula ngaaka.
Joel okwa kumagidha kehe ngoka e na okanona ka taalela onkalo ndjoka, ihe ihaka yi kosikola, ka tamekithwe osikola mbala omanga okashona.
“Aanona mboka oya pumbwa okukala haya tamekithwa osikola kuyele. Oyendji oye na eitaalo kutya aanona mboka kaye na sho taya ka tala ko kosikola. Aanona oya pumbwa elongo,” ta fatulula ngaaka.
Ta ti, aanona mboka otaya vulu okuninga ashihe tashi longwa kaantu ayehe, ihe oya shitwa ashike nomadhiladhilo gamwe gi ili, ihe otaya vulu okuninga ashihe.
Joel okwa ti, nonando ta kambadhala okuhwepopaleka onkalamwenyo yaanona ya taalela uunkundi mboka, natango okwa taalela uupyakadhi woku ya gwanithila po oompumbwe dhawo dhosikola.
“Aanona mboka oya pumbwa iidhanitho ya yooloka, mbyoka tatu kambadhala okugwanitha. Otu na natango ehala mOndangwa mpoka tatu vulu okutungitha osikola yetu, ihe uupyakadhi katu na oshimaliwa, opo tu vule okutambula aanona oyendji,” ta popi ngaaka.
Ta indile moshigwana kutya kehe ngoka ta vulu okuyambidhidha, ne shi ninge nohole ya vule okuyambidhidha aanona ya taalela onkalo ndjoka.
Joel Natango okwa indile kehe ngoka e na okanona ke li megumbo, a thikame nena e ke ka tamekithe osikola, oshoka ohashi kwathele noonkondo.
Maria Salomon ngoka e na okanona komimvo 11 ke na uunkundi woludhi ndoka, okwa hokolola onkalo yomonakadhona.
“Konima kwa li nda fala omumwandje Saima Ndilula kosikola, onkalo oya lunduluka. Onda kala ndi li naye megumbo sigo a ningi oomvula 9 oshoka onda li nda itaala kutya kosikla KE na sho ta ka tala ko, ihe nani onda iningilile mo,” ta hokolola ngaaka.
Ta ti, sho Ndilula kwa li ha kala megumbo, kakwa li e na sho ha vulu okuninga kuye mwene, kakwa li ha dhana, okwa li ha kala ashike e li mondunda a lala, ngele a inyenge ongele ta yogwa nenge ta lundululwa pehala.
“Onda li ndu uvite kutya uunkundi we owa shiga ko, nani ke na nando uunkundi wolutu, konima okwa li Nde mu fala kosikola yomadhewo, okwa li a ndjangumukwa nawa. Okwa li Nde mu fala kEluwa a ka tsikile osikola ye,” ta ti ngaaka.
Ta hokolola ta ti, paife oha vulu oku mu tuma a ete okakopi, nonando ita vulu okupopya nawa.
Ta ti, osikola oya kwathela Ndilula lela, onkene ota kumagidha kehe ngoka e na okanona ke li monkalo moka, a fale okanona koosikola ndhoka.
“Otandi pandula aalongi taya sile oshimpwiyu aanona yetu mboka, oshoka ohashi pula lela ohole okuza komutima okukala naanona mboka,” ta pandula.
– vkaapanda@nepc.com.na