Omolwomvula onene ya loko koAngola, NamPower okwa kumagidha oshigwana shi li popepi noshitaasi sholusheno koRuacana, shi tembuke oshoka otaya egulula omweelo gwomulonga omutiyali.
Omukuluntu gwoNamPower koRuacana Leonard Shemuvalula okwa ti omolwomeya ngoka taga kunguluka noonkondo, oya thiminikwa okupatulula omweelo oshikando oshitiyali.
“Omulonga oguudha noonkondo, shoka sha ihulwa okumonika mo2011. Omeya otaga kunguluka nookubika 1,600 posekonde,’’ ta popi ngaaka.
Ta kumagidha kutya omahala gomalukalwa gopakathimbo osho wo oshigwana nashi kale sha ninga omalongekidho opo kashi kanithe iinima yawo omolwomeya ngoka ogendji pamwe taga ka thika komahala gawo.
Shemuvalula okwa kumagidha wo aanafaalama yiimuna ya tembudhile iimuna yawo komahala ga yeluka, nokukwashilipaleka kutya omikanka kadhi na sha, oshoka otadhi ku udha omeya.
“Otatu kumagidha wo aatalelipo, yi ikaleke kokule nokuthikama kooha dhomulonga osho wo ya hedhe popepi nomeya oshoka osha nika oshiponga,” ta kumagidha ngaaka.
Oshiwike sha zi ko ngoloneya gwoshitopolwa shaMusati Erginus Endjala okwa kumagidha oshigwana shi kale uupathi opo shi tembukile komahala galwe okuyanda ekanitho lyoomwenyo osho wo iinima yawo.
Ta ti, oshigwana inashi tegelela sigo kwa toka opo shi tembuke, uuna sha lopotelwa kutya efundja olya thika popepi, ta popi kutya oshitopolwa she osha adhika kefundja, noya tembudha nale aantu yamwe.
Omanga omunawino gwomeya omukuluntu muuministeli wuunamapya, oohi, omeya niikwamavi Leonard Hango okwa koleke kutya omeya gefundja oga thika miitopolwa yokonooli.
Hango okwa fatulula kutya efundja olya ziilile koAngola sho omeya gomvula onene ndjoka ya loko moAngola ogo ga li ga udhitha omulonga omunene gwaCuvelai ngoka ga piti sigo okoongamba e taga yi mumwe nomeya gomvula taga kunguluka miishana.
“Omeya gomvula onene ya loko moAngola, oga piti okuza komilonga ndhoka dhomoAngola sigo ga udha oondama ndhoka dhi li ndatu, sigo omuundama uushona mboka wu li poongamba dhaNamibia naAngola,” ta ti ngaaka.
-vkaapanda@nepc.com.na