KATIMA MULILO – Mutai wa tuto mwa sikiliti sa Zambezi u bile ni mukopano wa kuikabela maikuto ni sichaba kukona kupima misebezi ye ezizwe kuamana ni mayemo sakata a tuto. Mukopano ne u talima cwalo ni lisitataliso zeo lifumaneha mwa tuto.
A na ungekile sichaba, tutengo twa kamaiso ya likolo (school boards), manduna ba likuta za sizo, ni ba lipisinisi, ka kukwalula mukopano, mueteleli wa sikiliti sa Zambezi Lawrence Sampofu na ize mukopano ki wa butokwa kakuzwiseza pili tuto mwa sikiliti. Ki kwa butokwa bashemi kuikopanyanga cwana kukona kutalima zeo lukonile kutula ni zeo lisali kwa mulaho. Ki kamukwa wo lukupa bashemi kusebelisana hamoho ni matichele. Ki kafo linako zemwi lika halisa taluhani hande lusupana minwana. Mwa tuto luikambota za bukamuso bwa bana baluna,” kwa talusa mueteleli wa sikiliti. Ka kuya ka sampofu, swalisano ki yabutokwa kwa mayemo a ku nanula sikiliti.
“Linepo za sikiliti a lisupi zibo ya matichele, batatubi ba likolo (inspectors) kapa baeteleli ba mutai wa tuto mwa sikiliti (directors) kono zibo ya makopanelo mwa sikiliti.
Lukona kuteula likiliti zemwi haiba inze lusebeza ka tata. A lutalimele silimo sa 2015 ka chiseho yencha,” kwa kupa Sampofu.
Mueteleli wa mutai wa tuto mwa Zambezi, Austin Samupwa na file manzwi a swana ka kukupa swalisano kwa sichaba. “Kachenu lufa lipiho za misebezi ya 2014. Lupima zeo lukonile kueza mwa tuto kakufa tuto kwa bana ba mina mwa Zambezi. Lutokwa swalisano ye tamahani kumina kukona kubupa sikiliti sa Zambezi kuba sesichilaukile mwa kufa tuto,” a talusa. Likwata ze chinchana-chinchana mwa mutai wa tuto wa sikiliti nelifile misebezi ya zona ya silimo.