Baituti babafitelela sikiti kuzwelela mwalikolo zeshelanashelana mutulo wanaha Namibia, neba neuzi mali mwakalulo yapili ya unumwaha, ofesi yebona zaneulo yamali (NAMBTS) nepatuluzi viki yefelile. Tokwahalo yamali haibonaha kuhula mwanaha Namibia, bakeñisa kukutela fafasi kwababa neula mali ni tokwahalo yetuna kuzwelela kwalipatela, sibuabui waofesi ya NAMBTS Titus Shivute nahatelezi kuli kufumana baneuli babanca kikwabutokwa kuli kubateñi kwamali kuzwelepili.
“Kwabaneuli ba 1 044 mwakalulo yapili ya silimo, ba 700 neba neuzi lwapili. Ili kusupeza kuekezeha kwa baneuli mutulo wanaha, mi taba yeo ikabapala kalulo yabutokwa hala baneuli bamali mwanaha Namibia,” nekubulezi Shivute. Naekelize kuli babali mwatasa 1% baneula mali mwasilimo, ili taba yebela tata ofesi ya NAMBTS kubona kuli kuba ni mali alukela mwalipatela.
“Lulikile kutalima taba yeo ni kususueza babanca babali mwamakete sakata sina baituti kuli bange taba yaku neula mali kuba yabutokwa. Kutokwahala baneuli ba 200 kazazi kuli kukone kuba ni tuso,” nekubulezi Shivute. Naize ofesi ya NAMBTS nebile ni lituto ni baituti mwanaha kaufela hamoho cwalo ni mutulo wanaha, kubaluta ni kubata kutusa kupahamisa nombolo ya baneuli mwalikolo. Kwamafelo baituti nebafiwa mampapili abupaki abakona kusebelisa kwapili. “Lwa itumela kubane baneuzi mali kaufela unumwaha, mi lususueza bayahi banaha Namibia babaswanela kuneula mali kueza cwalo nako ni nako,” nekufelelelize Shivute.