“Eedula dovanhu tava ka monika ondjo moimbofa yekwatonghonga otadi wedelwa needula nhano. Ngeenge omunhu okwa monika ondjo yekwatonghonga na pewa eedula okutameka 15 fiyo opo 20 ngeenge odi shona.”
Aa omatumbulo a minista yoyuuki Yvonne Dauseb pefimbo kwa li ta topolafana a mayele aye meumbo lakula lopashiwana Etivali kombinga yoshikumungu shekwatonghonga nomahepeko oukashike kookanhu.
Minista okwa hala oveta opo i kale tai yandje eendula 20 komunhu keshe ta kamonika ondjo yekwatonghonga.
Okwa ti ounona novakainhu ova ninga oihakanwa yokulongelwa oilonga youshada eshi ha kala tava kwatwa onghonga omanga vamwe ohava ningilwa omahepeko opaixulo.
Minista okwa hokolola ta ti omudo wa dja ko moshilongo omwa lopotwa oimbofa 690 yomakwatonghonga okudja Januali fiyo Anguste eshi ounona voukadona novakainhu va kwatwa onghonga.
Dausab okwa hala opo ovanhu va kwatwa onghonga opo va kale tava ningilwa omakonakono elixwa po onghee okwa ti eemhangu nadi kale tadi u ndulile oimbofa yomakwatonghonga komesho opo ku kale kwa ningwa omakonakono omoule.
“Ovanhu tava ka ninga oihakanwa yokukwatwa onghonga nava kale veli meameno la wana lopolifi momidingonoko davo, ina va pumbwa okukala tava ningilwa omatilifo kovakwapata ile kovafekelwa,” Dausab ta ti.
Okwa ti eemhangu nadi kale tadi pangula pauyuuki nokukwashipaleka kutya omunhu ta ka monika ondjo mekwatonghonga ota pewa ehandukilo la kula.
Dausab okwa ti epangelo nali tula po omikalo edi tadi dulu okuxulifa po onghalo yomakwatonghonga no nghee ovanhu tava monika ondjo ve na okukala vau ngaungwa navo.
Okwa hokolola ta ti ekwatonghonga oshimbofa sha kula nai onghee osha fimana oveta opo i yandje ehandukilo la kula opo ovakwatinghonga va yandje oshiopenena kovalumenhu.
Minista okwa popya yoo vali kombinga yomapekafano oukashike kookanhu eshi a hokolola ta ti eedula nhatu da pita moNamibia omwa lopotwa omwaalu muhapu wovakainhu nounona va ningilwa omahepeko.
“Onda hala oveta opo ya tula po eameno la wana moshiwana tashi ningilwa omahepeko momaumbo. Omunhu keshe ta ningile ovanhu ominyonena na kale a pewa ehandukilo lo paveta, epangelo nali kwashipaleka kutya okaana keshe oke li meameno lokukelela omahepeko,” Dausab ta ti.
Okwa weda po ta ti ovanhu nava kale tava ya kulwa pefimbo ngeenge ya ka lopota oimbofa yomahepeko oukashike kookanhu ile ngeenge tava ningilwa omalifo. – fhamalwa@nepc.com.na