Nonando efundja lya yelula aantu oyendji momagumbo gawo, unene moshitopolwa shaHangwena, kombinga yimwe olya ningi onzo onene yuuyamba woohi nomambalantangu ngoka taga dhenge po omukaga.
Oshigwana monooli osha kalela oontopa dha yooloka tadhi hugu oohi.
Ontopa ndjoka yi li poAkweenyanga moshitopolwa shaShana oya ningi ehala lyuuhupilo lyaakalimo yomomudhingoloko moka oshowo yomomikunda dhopopepi.
Oshiwike shika petameko sho oshifokundaneki shika sha talele po omukunda Akweenyanga, osha li sha mono aantu ya thika po-10 taya kwata oohi pontopa mpoka.
Maria Kambikiti a yambukile pomudhingonoko gwaAdolf, ngoka gu li popepi naAkweenyanga okwa ti, shoka she ya eta moshana taya pi omutenya esiku alihe, kaaye na oluthuwo, uuhupilo ashike.
Ta ti, oku uvite kutya oyendji ohaya thiki pontopa mpoka oshoka oshi li pomatondokelo gomeya, noohi ohadhi kala mo odhindji.
Kambikiti kwa ti, aantu yamwe oya za komalukanda kOshakati nOngwediva oshowo omikunda dhi li popepi okukonga uuhupilo.
“Oyendji tu li mpaka ihatu longo, katu na iiyemo yasha onkene otatu kondjitha okukwata oohi oshowo oontangu, tu ka landithe oshowo okufala omweelelo komagumbo,” ta ti ngaaka.
Sackaria Andreas ngoka kwa li ta kwata oohi esiku ndyoka okwa ti efundja olyi na uuwanawa nuuwinayi, ashike ye ote li pandula.
“Efundja ohali tu etele ongeshefa tayi kalelele. Shoka tu na okuninga, okulonga ashike nuudhiginini opo tu kwate oohi dha gwana nawa,” ta popi ngaaka.
Ta ti, ohaya kukutike oohi oshowo oontangu ndhoka haya ka landitha konale.
Efundja olya ponokele onooli iiwike ya zi ko, ndyoka lya endele mumwe nomvula ndjoka ya ningi esiku tayi ga tilehi nawa monooli. Oshiwike sha zi ko aakalimo yomonooli oya ningi esiku taya ligola sho taya li ooniimboto.
Omafuma oga kala nokulandithwa moondjila, noyendji oya li ya pandula sho ya mono po okathilinga kawo komboloto.
Vkaapanda@nepc.com.na