Abraham Mwanyekange 

Ehangano loLa-Grace Creation Trading otali ka yandja omadeulo oshali kovanyasha Ovanamibia, ovanhu tava lumbu noulema osho yo oomeme ovalikaleli petameko laMei neudo. Omadeulo oo taa ka ningilwa mOshakati, Ohangwena, Ondangwa, Windhoek osho yo Walvis Bay otaa ka longa ovanhu okueta po eefewa dokukosha, eefewa dokulikosha domeva osho yo okuteleka oumbishikiti nopizza. 

Omadeulo aa otaa kwatelwa komesho kuLovisa Grace Epafras ou e li omutotipo woLa-Grace Creation Trading. Oku li yo ongomunashipundi wovanyasha moshikandjohoololo Olukonda. Otaa ka upika nokulonga ovo va tofwa mo omaunongo ahapu meenghalamwenyo davo. 

Epafras okwa lombwela Kundana ta ti okwa tameka nale nopolohalama yokudeula ovanhu mbali da ka dilongela konima eshi a mona ovanhu tava mono oihuna efiku nefiku. “Ovanyasha noomeme ovalikaleli vahapu kave na sha oilonga. Ovanaulema navo oshevaningila shidjuu okumona eemito doilonga molwa onghalo yavo,” ta ti. 

“Onda mona ovanhu vahapu tava hepa molwokua na oilonga osho yo ounongo washa. Nokudja opo onda tokola okuninga po sha osho tashi dulu okulundulula eenghalamwenyo davo,” ta ti. 

Okwa weda ko ta ti omadeulo aa ta ka ninga kae fi ashike ovanhu ve lihonge ndele ote ke a ninga okupa ovanhu omukumo. Okwa ti okwa hala ovanhu ve lifikamena po vo tava file eenghalamwenyo davo oshisho vo vene. 

“Omadeulo okwa fa a nafangwa ashike otaa yandje ounongo uhapu nouna oshilonga monghalamwenyo yokomesho yanaku atambula ,” ta ti. 

Epafras okwa ti omadeulo aa ote ke a ninga oshali shamuhongi, ita ka pula nande epeni lasha. 

Okwa indile unene ovanhu ovo tave lihange ve li moluhepo ovo va kufe ombinga momadeulo aa opo va dule va lundulule eenghalamwenyo davo konima yomadeulo. “Onda itavela kutya okulonga ovanhu oilonga yokeenyala osho yo oku va pa eshiivo lokueta po oikwafifo otashi shunifa pedu ondjala noluhepo moshilongo,” ta ti. 

Okwa ti mopaife okwa yandja omadeulo kOvanamibia vahapu moitukulwa yokoonooli yoshilongo. “Odula ya dja ko onda deula Johannes Nghihalwa oo ta lumbu noulema koshitukulwa oshikoto. Mopaife ngaha ota longo oimaliwa yaye, a kuta novanaiolnga vane. Ohandi indile opo aveshe va kufe po omhito ei manga i li po,” ta ti. 

Nonande ta longo noudiinini okuvatela ovanyasha vakwao Epafras okwa ti oku na omashongo. “Oikwatifo unene tuu oilongifo oyo ndi na okulongifa pefimbo lokuyandja omadeulo aa ohai pu po, naasho ohashi eta efimbo limwe ndi kaleke omadeulo. Ohandi indile kOvasamalia ovanamutimanghenda ovo ve wete nove u udite eshi andi ningi opo va kwafelele nge noilongifo efimbo omadeulo taa ka ya metifa, inandi hala oimaliwa ndele omunhu oto dulu ashike okulanda oilongifomwa yomadeulo opo tu shive tu deule ovanhu momwaalu uhapu,” ta ti. 

Omadeulo otaa ka kala ko melandulafano ngaashi tali shikula. Oshakati omu 1-2 Mei, Ondangwa 9 Mei, kOhangwena 22-23 Mei, Windhoek 29-30 Mei omanga koWalvis Bay 5-6 Mei. Nakeshe modoolopa okwa ti ota ka deula ovanhu ve li meni 100. 

-amwanyekange@nepc.com.na