Abraham Mwanyekange
Ongomukalondjiikilile komikunda osho yo meedoolopa ngeenge mu na omaudano pokapale luhapu oto hange po enyakwa olo li shi kutangumuna nawa oudano nokweeta ehafo. Naftali Daniel Mashuna naye oumwe womwaavo ve na ounongo kamana.
Mashuna, odalele yokUuthilindindi mOshakati shokouninginino okwa lombwela omutoolinghunana wetu ta ti okwa tameka okutanga oudano wokatanga kokeemhadi peedula 16 mo 2016 efimbo olo a ti okwa li e na ohokwe yakula mokatanga kokeemhadi.
Okwa hepaulula kutya okwa longifa okangodi kashona okukwata ewi laye ta ti okwa kala nokuliendifa po oikando ihapu ta pwilikine kewi laye kutya oli li ngahelipi.
Nokwa ti okudja opo okwa mona elunduluko liwa efiku nefiku.
Mashuna ta ti efimbo eshi la enda tali pula komesho needula tadi i okwa ka mona omhito yokutanga omaudano opomikunda davo.
“Ovanhu vahapu ova kala nokupwilikina nge nawa ngeenge handi tange okatanga fiyo opondodo apa nda ka mona kutya ova hokwa nge nokudja opo vahapu va tameka nokuli okutwa nge omukumo opo ndiha shune omutwe miipeta, tava ti oshitalendi nashi ye komesho,” ta ti. Okwa ti konima eshi a ka pyokoka nawa novanhu vahapu ve ke mu landula okwa tameka okudengelwa eengodi okudja kovaunganeki vomaudano opo a ka tange omaudano omafiyafano akula, ngaashi ekopi laMayola waShakati osho yo otonamende yaTse Yaa Kuku yokomudo.
Mashuna ta ti neudo okwa mona vali omhito ya yeuluka eshi a dengelwa komunani womangeshefelo wospana yEeshoke Chula Chula oyo hai dana molixa yopombada moshilongo opo a ka tange omaudano aChula Chula ngeenge tai dana i li meumbo.
Mashuna okwa lombwela Kundana ta ti Damian ‘Nakulwa’ Shuumbwa ha longele koradio yaKati FM oumwe womwaavo ve mu kumika noku li dingi moshimhungu eshi.
Okwa weda ko kutya okutanga oudano osha pumbwa elitulamo osho yo okukala omulanduli muwa wokatanga kokeemhadi, to kala natango u na owino unene okukoneka nokushiva ovadanauki neendjokonona davo.
Mashuna ta ti nonande ta tange okatanga kokeemhadi oku li yoo omunafikola koshiputudilo sha-IUM, okwa twa omukumo ovo ve na oitalendi yonhumba opo ihava tale ashike moitalendi ndele nava diinine yo elongo lavo molwaashi oshitalendi ashike itashi ku pe omboloto monghalamwenyo yoye aishe.