Ogu gakarerapo vantu ava valitura vene asi owo kugwana eparu lyawo mokulirandesa marutu gawo Rachel Love Gawases katente asi nampili ngomu kuna kara kambumburu aka koCovid -19 vanakuzedira sirongo hawe kuna gumu nye ngesefa zawo mokugwana yimaliwa, ntundi nawo vahepa kuvatura asi yirugana yohepero moNamibia, awo yimo nye vana kuyimona asi yirugana yawo eyi kwakara yohepero unene asi nawo vahepa kuvatara eho. Gawases katente asi kupata sirongo kuna kara hepero unene koukanguki wovantu. Nokutanta asi nsene awo kapi vana kuliza noveta ntudi kapi vahara vantu, vahepa kuruganena kumwe nonoveta dosirongo ngomu yina kara asi sirongo vanasipata.
Varugani ava yina vagumu unenen yokupata sirongo, morwa sinzi sawo kuruganena ngesefa zawo monombaha, monoclubs ntani monohetera. Ntani vamwe vawo kuruganena ngesefa ezi ponze zosirongo ntani monda zosirongo. Ano kuna kutanta asi veta ezi zokupata sirongo kapi zina kuvaninkiliramo morwa vahepa kuzuvha asi yirongo nayinye ngorooro yina kara.
Yirugana yetu mulyo unene, nye nampili ngoso, twahepa kuruganena kumwe nepangero ntani twahepa kuyizuvha asi yinke yina karere ngesi yipo asi nose twahepa kuyikwama ntani kupoera varandi vetu asi vahagwana kambumburu aka koCovid-19 yimo ana kuhundira ngoso varugani vakwawo. Gawases katente asi vaNamibia kwasika konyara 600 -700 ngoso ava rugana ngesefa zangoso awo kwakara monontambo ntatu; Ava vakara asi morwa eparu, ntani ava vahara tupu kukara kumwe novagara, ntani ava vakara nye asi owo kwayiliringera yangoso. Nampili asi awo kuyigwana nye mompito ozo, ose kupura yimaliwa yina siki koN$2000 ndi N$3000 ngoso nye ose kuruganesa yimaliwa oyo koyihepwa yetu. Age katente asi nare gagusa asi vahepa kukara nonoaccount dawo kombanga. Awo kwakara asi yiwo vahuguvara mekoro lyawo ntani kutara asi ekoro lyawo liparuke. Yimo ana kutanta Gawases.
Gawases katente asi nayikara udigu mokugwana yimaliwa eyi lina turapo epangero N$750; nampili ngoso,awo vaNamibia, nampili ngomu vakara asi vanangesefa wokurandesa marutu gawo-nawo vamwe vana wapere kugwana yimaliwa kepangero. Unangondo kapisi epopero Trust Namibia Nikodemus ‘’Mama Afrika ‘ Aoxamub katente asi ngomu yina gumu vadinguli, nowo yina vagumu, momunene morwa yiwo varandi vawo wovanene.
Mama Afrika katente hena asi nampili ngomu vakara asi kapisi paveta mosirongo vaninke ngesefa zangos, awo kurugana ngesefa ozo nawo vana wapere kugwana mauwa ogo vana kugwana vakwawo vatunga momavango ogo vatunga. Age simpe kagwedereko asi varugani vakwawo ava vaharwanesa varandi vawo yipo vahahanesa mukisi ogu makura vahehepa kuruganesa ngesa ezi kupitira monongodi. -sikela@nepc.com.na