Eshi eenhauki daAngola tadi twikile nokulivakela moNamibia, tadi pitile unene koshitukulwa shaMusati, ngoloneya moshitukulwa osho Erginus Endjala okwa ti Ovaangola nava lopotwe diva opo va dule okukala va shunifwa diva koshilongo shavo.
Ngoloneya okwa kunghilila oshiwana opo shi kale tashi lopotele ombelewa yaye ile eembelewa dookansela ngeenge sha mono eenhauki tadi tavakana momidingonoko davo.
Endjala okwa ti konima eshi epangelo laNamibia naAngola kwa li la ninga omutumba muJanuali ola lombwela ovaleli vaNamibia kutya eenhauki nadi kale da shuna koshilongo shavo shaashi epangelo laAngola otali dulu paife okuyambidida ovanhu valo.
Epangelo laAngola okwa li la yelifa kutya neudo okuna omuloka muhapu moshilongo Angola onghee ka kuna vali oshikukuta eshi kwa li sha taukifa ko Ovaangola.
Endjala okwa ti ta ombelewa yaye otai landula omilandu edi da tulwa po kepangelo laAngola pefimbo kwa li va ya momutumba. Ta ti Ovaangola ina va pitikilwa mo neudo moshitukulwa shaMusati ndele nava ye koshilongo shavo va kalime shaashi neudo ka kuna vali oshikukuta.
Ngoloneya okwa lombwela Kundana ta ti epangelo laAngola ola tula po elombwelo kutya otali ka kwashipaleka kutya otali ka yandja omakwafo oikulya, nomayakulo opashiwana keenhauki ngeenge oda shuna koshilongo.
“Momwedi Januali eenhauki dovaangola 4000 edi kwa li dangudumana pEtunda moshitukulwa shaMusati oda tutwa po keepangelo lavo opo di dule okushuna koshilongo shavo, ashike omafiku aa otwa lopotelwa eenhauki tadi li va kele moNamibia hadi pitile koshi yodalate shaashi odalate oi na eembululu,” Endjala ta ti.
Ngolonaye okwa ti ngeenge eenhauki oda alukile mo mOmusati kape na apa tadi ya okudja shaashi onheele ei kwa li hadi di tete oya hanaunwa po filufilu.
Onghee eshi otashi ka kala oupyakadi wa kula ngeenge Ovaangola ova pewa epitikilo lokukala va lukila mOmusati unene tuu pefimbo eli lodula shaashi otava kala tava lokwa kodula nounona vavo va shona.
“Oshiwana ina shi pitikwa okuyandja oilonga keenhauki ile okuidilila eenhauku momaumbo avo,” Endjala ta ti.
Okwa weda po ta ti kukeshe ou ta kamonika tava longifa eenhauki ota ka pewa ehandukilo lopaveta shaashi eenhauki ina di pewa oufemba wokulonga moNamibia.
“Ovanhu inava pitikwa okuningila eenhauki ominyonena, eshi sha pumbiwa okulopotela ombelewa yange ile oveene vomikunda kombinga yeenhauki,” Endjala ta ti.