EENHANA- Minista koshikondo shoipambele yombelewa yOmupresidente Christine ||Hoebes okwa ti epangelo ota li twikile okuyambidida omaulikilo oipindi molwashi otaa yambula po eedoolopa.
Edi okwe di popya pefimbo kwa li ta patulula pambelewa omaulikilo oipindi aaEenhana Etitatu.
Ovanafikola, ovaleli vopamufyuululwakalo, ovanangeshefa okwa li va ngudumana kendiki lomaulikilo oipindi kEenhana pefimbo lepatululo pambelewa loipindi.
Paife ngaha oshi li oshikando 14 elelo lodoolopa yaEenhana ta li ningi omaulikilo oipindi. Oipindi oya tameka momafiku 29 Juli notai ka xula momafiku aane omwedi ou.
Ovangeshefa 192 mwa kwatelwa omahangano okuyandja omayakulo otava kufa ombinga komaulikilo oipindi aaEenhana. Minista okwa pandula oshiwana eshi tashi twikile nokulandifa oilandifomwa yavo yoshiwambo. “Onga Ovanamibia nafye otwa pumbwa okulonga oinima yetu ndele hatu landifa kovapashioni,” ta ti.
Okwa ti ovanangeshefa otava shakeneke epangelo ondjilakati okueta po eemhito doilonga noshoyo okulwifa ondjala noluhepo.
Okwa kumaida yoo vali ovanyasha opo va kale tava kufa ombinga moinyangadalwa younamapya tashi pitile mokuninga oikunino yavo nokulandifa oikufomwa ya yooloka.
“Ka leni ta mu yambididafana. Ovanangeshefa nava topolafane omayelele nghene ve na okuyambula po eengeshefa davo,” ta ti.
Mayola wodoolopa yaEenhana Omri-Onn Kavandje okwa ti omaulikilo oipindi okwa dana onghandangala ya kula mokuyambula po odoolopa yavo.
“Elelo lodoolopa Eenhana ota li twikile okuninga omaulikilo oipndi molwashi otashi eta eemhito doilonga kovanyasha,” ta ti.
Ovalandifi tava kufa ombinga komaulikilo oipindi otava nyenyeta tava ti neudo ka kuna ovalandi komaulikilo oipindi.
“Ovanhu itava holoka momwalu muhapu okulanda oilandifomwa yetu. Omudo wa dja ko okwa li tuna ovalandi vahapu,” umwe womunangeshefa ta hokolola.