Oshiningwanima shopandjokonona osha ningwa konima sho Sibabalwe Gcilitshana nuumvo a ningi omuntu gwotango keeshi omukiintu meukililo ta kutha ombinga methigathano lyokakadhona dhingi Okasouth Africa. Omunamimvo 24 nguka a za koCape Town okwa li a ulikwa onga gumwe gwomaakithimbinga 16 yahugunina poshituthi shoka sha li ko momasiku 11 Juni. Ta popi kombinga yoshinima shika sha lundulula ondjokonona, Sibabalwe okwa lombwele oTimesLIVE kutya okwa hala okumonika nokudhimbululwa onga ta kutha po ehala ndjoka ya kala nale lyaa niwe kaantu mboka ye mu fa note ke ya kalela po nondjungu.
“Onda hala aantu ya tseye kutya uukashikekookantu wandje hawo ashike oshinima ndi lile po mpaka. Ondi inekela shika otashi ka taambitha ko uukashikekookantu awuhe nondi inekela omashenge taga landula ko, mboka ye na iikuyali nooshitiwa-walye ita ya ka ulikwa nuukashikekookantu we; ta ka ithanwa owala onga omukuthimbinga moMiss SA,”ta ti ngaaka.
Omukuthimbinga nguka i ilongela uuyuuki koUnivsity yaCape Town omonakadhona gwomudhani gwiinyandwa a tseyika nawa Sibulele Gcilitshana, ngoka a tseyika nawa onga omudhani moshinyandwa Society, moka ha nyanda onga omulongisikola e li shilume ipiluka hashi ulike ko SABC – moshinyandwa muka oha dhana onga Beth Mazibuko.
Oku na euveko kutya okukala moSA onga omukiintu a li omulumentu kevalo kashi shi oshinima oshipu, nokwa hala okukala ta gandja ehokololo lye.
Ta popi nkene a dhiladhila okwiikanyuna okuza kaatondi ye naamboka ye tonde omashenge mboka tashi vulika ya kale inaaya hala a kalele po oshilongo omolwa sho e li eshenge, okwa ti: “Shotango, kehe omuntu ngoka a hala okuhanagula po omuntu omukwawo ina pumbwa okupwiikinwa. Kashi na sho tashi ti, nomathimbo gamwe olundji okukala inoo popya nayo osho dhingi. Oshitiyali, ondi iyinekela ngame mwene na kandi na naamboka ye tonde omashenge. Ondi li mpaka ndi kwatele komeho okwiilonga nokulonga notandi ka longitha oompito ndhika onga oopito dhoku ilonga nokulonga aantu kombinga yomayooloko osho omauthemwba gaantu ayehe , ngoka ga gamenwa kekotampango.” Ethigathano lyokakadhona dhingi Okasouth Africa otali ka kala ko momasiku 9 Aguste, mesiku lyoomeme poSun Arena moTime Square moPretoria.
-Sowetan