Charles Ndeumane
Ehangano lyoNamibia Fish Consumption Promotion Trust olya gandja omayambidhidho ga yooloka kosikola yaanuulema yEluwa Special School mOngwediva, oshowo kosikola yEkoka Combined School yokOkongo.
NFCPT okwa yambidhidha oshikondo shuunona wu na uunkundi wopamadhiladhilo shoIntellectual Impairment Section shoka shi li shimwe shomiikondo mbyoka yi li mEluwa Special School nesiga lyohaasa lyomasiga ga hamano lyo ku telekela aanasikola ye li momuhandjo, oshowo ekende lyohaasa lyookilohalama 48. Mbyoka ayihe kumwe oya kotha NFCPT oshimaliwa shoondola N$58, 900.00
Omunambelewa omukuluntu gwoNFCPT Victor Pea okwa ti omayambidhidho ngoka oga landula eindilo lyEluwa Special School lyomakwatho go ku yambidhidha opolohalama yawo yiikulya yaanasikola mboka ye li momuhandjo. NFCPT okwa gandja wo iipakete yoohi dhohorse mackerel dhookilohalama 90 kosikola ndjoka lwoshikando shotango okuza sho a li a uvanekele osikola ndjoka omagano gookilohalama 90 dhoohi tashi ningwa oomwedhi ndatu kehe. Pea okwa ti shoka otashi ka kotha NFCP oshimaliwa shoondola N$11, 012.40.
“Omayambidhidho gonena ota ga ulike eitulemo lyaNFCPT lyo ku kwathela uunona mbuka wu na uulema mboka wa pumbwa esiloshimpwiyu esiku kehe, eindhindhimiko, nohole. Onga ehangano otu uvite ko oompumwe dhawo no tu na oshimpwiyu. Kakele komashongo ngoka ga taalela osikola ndjika, ondi na einekelo kutya omahangano galwe nago ota ge ya oku yambidhidha Eluwa Special School,” osho Pea a ti.
Omukuluntusikola koshikondo shuunkundi wopamadhiladhilo shEluwa Special School Loide Shipopyeni okwa ti omayambidhidho ngoka otaga yi ondjila onde mo ku kwathela osikola. “Otu na iikondo itatu mEluwa Special School, shimwe oshuulema womeho, shimwe oshuulema womakusti, naashika sha pewa omayambidhidho nena mpaka shuunkundi wopamadhiladhilo. Otu na mo aanasikola ye li 54 mohandjo gwetu, ashike oshikondo shika kashi na okombitha yasho shene, oha tu pewa iikulya kookombidha dhiikondo mbiya iyali. Ashike paife sho twa pewa esiga, ota tu yi koshikondo shelongo moshitolwa shaShana tu tale ngele ta shi tu pe aateleki opo tu kale nokombitha yetu,” osho Shipopyeni a ti.