Tji ṱa tji zembwa, tji riwa pe pwa nu tji tji ha yanda tji huna.
Kwa sewa ozoiri kaatjondumba uriri tji zeri ozengi kehi yo-36 Onamibia okuvizirikirira Operesindenda Oute nu Ihe yOtjiwaṋa, omuyaruke omuheṋendu Onongo Sam Shafishuna Nujoma, muhuka ngu ma suvisiwa pEtjo rOzombangaṋe pendje notjihuro ohongora tja Namibia, mOtjomuise.
Ndino ndi orupoo romayandjero wondjozikiro kuye motjihuro ohongora pomurongo na imwe maru zu pOtjikunino tjOndjuwo yOzoveta eye pa rara tja zire kOtjozoroue erero okuyenda kOrutjandja rOngutukiro kutja tji nozominute omurongo na ndano okutona omurongo na imwe otjiungura tjomayandjero wondjozikiro otjisenina tji ute. Ndino ndi omuyaruke omutjiṋikwa opu ma rara kutja otjiwaṋa tji tokerwe ama tji mu virikiza nokumutara narire pu ma zu muhuka omunene tji ya piti ozominute omurongo na ndano momuvyu okuyenda kEtjo rOzombangaṋe pu ma kasuvisiwa. Orupoo rwe amaru yatakaṋa mOmurari imbwi Orugby, Osoftball, Owika, Osean McBride, Ofrank Fredericksa, Ohosea Kuṱako ngandu tji mau kahita mOrehobotha naru ramanga omurari imbwi ngandu pEtjo rOzombangaṋe.
Tjandje indi erero tja zire kOtjozoroue au hwarere ama virikiza motjihuro po-8H30 okuza pOrutjandja rOzonḓera indwi Ohosea Kuṱako pendje na Tjomuise a hoo nomurari imbwi Ob1 okuya kotjihuro a tuurunga omurari imbwi Omandume Ndemufayo, Ohosea Kuṱako. A katjaveka zombaze mOkatutura momirari vyarwe ovingi tjimuna aya takaṋa mOmoses Garoeb a tuurunga Okhomasndara nganda a kavaza komaturiro inga Otjomuise a ryanga ryanga nokuyatakaṋa momirari pekepeke mOkatutura ngandu korusenina mOkatutura tji ma toora omurari imbwi wOngutukiro aya takaṋa pOsoweto, omberoo onene yOswapo ya Namibia a kapita ponganda yomazemisiro womiriro ai kondovitivi yotjihuro tjapo nganda a kavaza pOtjikunino tjOndjuwo yOzoveta.
Erero tja tjirirwe ama heruka mOtjomuise okuza kOtjozoroue otja ryangere momivanda vyotjihuro nu ndino ndi wina otjokuvirikiza otji mape kara nondjozikiro osenina.
Erero otja tjirirwe ama kotoka motjihuro ohongora okuza kOtjozoroue ouṱuku werero, Oritjaine, ma rarere eyuva tjingero aa tjirirwe ame ritupuka okuza kEzorongondo kErongo ku imwe yozondjozikiro hambondatu mouparanga wehi motukondwa nḓa utirire Omandaha mondwa ye kEtunda mOrukondwa rwa Musati eye mo 1929 ma kwaterwa.