Lahja Nashuuta

OPUWOS – ǂHanub ge Namibiab ǁHûidi !Nansa (ECN) helikoptersa ge mā hâ i, ǁhûis ǂgaoǀkhādi ai ra dīǀoaoa ǁanǂgāsaben, Kunene ǀkharib din, kaise a !garo !â!âgu !nâ hâna sī xoamâis ase. Mike Nganjoneb, ECNs di ǀkharisi !khōdana-aob ge New Eraba ge mîba, ǁhûidi sîsenaon ge helikopters ǀkha Opuwosa xu kaise a !garo !â!âgu ǁga 26 Gamaǀaeb 2024 dis kōse gere ǁkhana-ūhesa. 

Nē helikopters ge Skeleton Coast Safaris, Sierra Cafemas, Otjavajas, Okakoras, Otjomumborombongas, Otjiheke Tjangututus, Onjezus, Ehekeratjitindis, Otjahawes, Orovihekes tsî Orokaues hâdi !aroma kai huib ase ECNsa ge ība. 

Nganjoneb gere mîsa !oab ge Kunene ǀkhariba xoamâisens !aroma 31 !nandi !nâ a goraǂgāsa tsî supuse administrasisa !khoe kais !aroma ǀgam kai !âkha hîa Kuneneb ǀAwas tsî Kuneneb !Khawagas tsîna. 

Kuneneb ǀAwas !âb ge Opuwos kai!ā, Opuwos !garo!ā, Epupas tsî !Naniǀaus hâde !khōǂgā hâ, Kuneneb !Khawagas !âb Kamanjab, Khorixas tsî Outjob tsîna haob ai 104 xoamâisens sîsenaon ūhâse. 

Nganjoneb ge ge mî, xoamâisendi kaise ra ai!gûsa, nē xoamâisendi ge 3 Gamaaeb 2024 ai a ǂnāǁnâsa xu, nē tsî nau ǂhanixūron ka hâ xawe. 

Nēsis kōsen ge 20 000 khoena xoamâisen hâ. Nē !gôaba xun ge !nāisenaona a ǂkhamkhoe, !gōsase -nān hîa ǂguro !nās ase nî ǁhûina.

Xaweb, ǁîba gere mîs ge, skolgu di mâiǂuis khao!gâb ǂkhamkhoen di xoamâisens !gôaga ge ǁgôaxasa, !nāsan mâiǂuidi ǀkha ge ī amaga. 

“Sida xoamâisen!khaigu tawagu ge !gôaga îbe ǂkhawusa tama hâ. 

Sida ge 100 xa a !nāsa khoena tsēkorobe ra xoamâi tsîb ge nē !gôaba !garo!ādi tsî kai!ādi hîan !nāsa khoena mâiǂuidi ǀkha a ǀkhaixun ǁga da ga a kō o, a !amku !gôa,” tib ge gere mî. 

“Kurib di tsoatsoas !nâ da ge saride gere dīma, ǁangāsaben !gôaga ǂans !aroma, on ge ǂaunase khoena mâ !garo!ās hoas ai ge hâ i, xawe Ovahimban di ǀgui !khai-i ai ǁanhâhâ tama i tsî doema ra ûiǀgaub, !gōsase ǁgam-i tsî !gâi !û-aiba ûitsamaxūn ân !aroma hōbasens dib ge ǁgoaǂuis ase nē kharib xoamâisendi !aroma i, nausan !garo!ādi ǁ-gan nî ǂoas ai!â, ǀnî khoena ra sîǂui nē khoena sī nî ǂgaoǂgao!nâ tsî ǂanǂanse mâǁaen sîsenaona nî hāsa,” tib ge ai!â gere mî. 

ǀNî ǁgoaǂuis ge, ǁgauǁgausenǂkhaniden ǀnî khoena ūhâ tama hâsa, !gōsase gure-aoga.