ONDANGWA – ǂNûkhaeba ra Dana Sîsenǂuira Mâisab (CEO), Toivo Shovalekab hîa a ǀAwas !Nanǀgaib ǀGoraǂuis ǂNûiǂgās (Nored) dib ge ge ǂanǂan, ǂoa ge kurib di Gamaǀaeba xu nēsis kōses nē ǂnûiǂgāsa ǀhaob ai 13 !nae!khaidi !nanǀgaib ǀkha !gaeǁaresa ūhâde !nuri hâsa ǁîde xun hûna ûiga ge ǂoa!nâse. “Nē !gôaba xun ge !nani ǀhûhâsib ǁanina tsû-aina ge hō,” tib ge Shavalekaba ǂoa ge wekheb di Denstaxtsēs aib ge Oshana ǀkharib !nâ ǂnôa Ondangwas !nâ ūhâ i ǂnûs tawa ge mî. 

Nē ǂnûs !nâb ge !Nanǀgaib Mûǂams ǀAwemā!nans (ECB) di Dana Sîsenǂuira Mâisab, Robert Kahimiseb tsîna ge am!nâxa i. Shovalekab gere ǀgonǀgon!gao !khais ge nē !nôa !hau!hausa !nae!khaidi kaise tsûsa ǂâiǂâi!nâs ase īsa, ǁnāti ī ǁkhōǁkhōsa !ereamxasib nē ǂnûiǂgās !norasasib hōhō!nâs ǂnamipe ūhâs disa. “Sida ge ǂnûiǂgās ase dā!harode nî ǂgâxa-ū, aiǁgause !norasasib hōhō!nâs ǁkhāǁkhākhâide !Hoaǂkhaib ǀams ai!â dīs, ǁkhāǁkhākhâide ǀhûhâsigu !nâ tsoatsoas, ǂgaogao!nâ Noreds !oabade ra sîsenū ǀhûhâsigu ǁanina in !nae!khaina ǁkhā ǁaeb ai sida di mario ǁâǁawa!gôadi tamas ka i o !nubu haisi-ams (SMS) !nâ-ū ǂanǂan. ǂGan du ta ge ra î du ǁnāts go nē ǁhōba a !nuri!gâ-ai sîsenao-i ǀonsa ǂan ǂgao,” tib ge ge mî. Hoa sîsenaona ǂurusib tsî !norasasib ǁgaragu ǂnamipe hōhō!nâs ge ǀnai ge tsoatsoa-ūhe. Kahimiseb ge ǁîb ǀkhāba xu gere mîs ge, ǁkhaisa khoen !kharu ge haka kurigu !nâ ûiga ge ǂoa!nâsa. 

“ǀNî koro khoen ge 17 !kharaga !nae!khaidi !nâ ge ǀae-omǂgâ !nanǀgaib ǂnamipe hâ tsû-aina xu,” tib ge ge mî. Nē !kharaga !nae!khaidi ge Noreds, NamPowers, Cenoreds, ǀAeǁgams !Ā!khōmais, ErongoReds tsî Kameelboom Power Supplys hâdi tawa ge hâ. Noreds ge hoan xa a !nāsa !gôab !nae!khaidi hîa 41%gu tsî 63%gu ai hâde !khōǂgā hâ. Kahimiseb ge Noredsa ge ǂgan, in ǁîn ôa!nâdi ǁnāti ī !nae!khais !gûkhoenhâ!khai-i tawa-i ge sari-ao-e ǁî-i ûiba mā-ams ose !nanǀgaiba ǂgaes !nâ-ū ge a hâ !nae!khais !nâ-ū a ǂoa!nâs ǂnamipe, !nuriba dītoa î-i tsūdī-ao-e ǂanhe. 

Noreds sîsenaon ge ge mîbahe, in hoaǁae ǂkhaigari hâ tsî hâ ǁkhā mā-ams ose a !hûǁaresa !nanǀgaib darana ôa!nâ tsî ǁkhaehe ǁkhā tsūke!gân tsî mā-amsa tama !nanǀgaib !hûǁarede ǁkhae. 

“Noreds ge ǁîs di ǁgâu!nāpe xoaǁguigu, !norasasib tsî sîsenaonûitsaba !nanǀgaib sîsenǀgaugu ǀkha ra sîsenn diga ǁkhawa kō!gâ tsî ǀgaisa ǁkharab ǀgauga nî !ûǂamaona ǁgui-ai,” tib ge ge mî.