Omufekelwa momunyeka okawe ota holoka nena momhangu 

Omufekelwa momunyeka okawe ota holoka nena momhangu 

Omulumenhu ou a kwatwa po pefimbo kwa li ta kendabala okuvaka okawe navakwao kehangano loNAMDIA ota holoka nena momhangu koWindhoek. NAMDIA ehangano hali tuvikile okawe ngeenge ka dja keemina.

Opopiliko wopolifi Chief Inspector Elifas Kuwinga okwa koleka ta ti omufekelwa okwa kwatwa po Olomakaya keembelewa doNAMDIA efimbo lokomatango.

Opolifi oya hokolola tai ti ovalumenhu vane ova ponokela eembelewa doNAMDIA ndele tava vake mo ouwe ovo hava di keemina.

Fiyo opapa kape na ouyelele kutya ouwe vangapi va vakwa po.

Poshiningwanima opa xulifila omunailonga woNAMDIA kwa li ta longo ongomukulunhu koshikondo sheameno, Eiseb Francis weedula 57.

Francis okwa yashwa nondjebo momutwe kovafekelwa pefimbo kwa li e li kombelewa ta longo. Opolifi oya hokolola tai ti pefimbo loshiningwanima umwe womovafekelwa Max Endjala okwe liyasha nondjebo meembelewa doNAMDIA eshi a mona kutya okwa fitikininwa mo kopolifi.

Okwa ka xulifila koshipangelo efiku tuu oshi ningwanima sha longwa.

Endjala okwa li omunailonga kehangano loTrustco kwa li ta longele koWindhoek.

Opolifi oya hokolola tai ti ovafekelwa vavali ova faduka po nove li tava kongwa kopolifi.

Omakonakono opolifi otaa twikile moshiningwani eshi. -fhamalwa@nepc.com.na