Mulisa Simiyasa

KAIǀAUB – Kaiǀaub di !Ā!khōmais ge 3 400 ǁgam-i meterdi sîsenūs ai!â ra ǁamahede ǂoa ge Hôasoreba xu tsoatsoa tsî !ās a ǂhabase ge ǂgā. Nēs ǀkhas ge !ā!khōmaisa !gâi ai!gûsa ǁamaǁgam-e ǁanǂgāsabena sī-ūbas !nâ ra dī. 

Projeks nēs !nâ-ūn ra sī!nâ ǂgaos ge, ǁaupexa 7 000 ǁgam-i meterde omaridi, ǂharugun, ǂhanub !khain tsî kerkhegu !aroma ǂgāsa. 

!Ā!khōmais di mîgowaba-aob, Luke Salomob ge ǂoa ge wekheb di Wunstaxtsēs ai ge ǂan!gâ, nē ǁgam-i meterdi mario!nâse ra dīhesa, xawes nē mario!nâse dībahesa hâhâ tide !khaisa. 

“ǁNā ǁanǂgāsaben hîa ǁîn ǀonde !ā!khōmais tawa si ǁgaramâis ǀkha ra aitsama !onkhao kaisen tsî ǁnaetisa ǀgaub, aibe sîsenūtoa tsî ega mātares ǀgaub di ǁgam-e sîsenūs ǀkha ai!gûgarun, ge ǂâis !nâ nî ūhâ ǁaeb nēb nî !kharus kara, on aitsama metersa ǂgābahes !aroma nî mātaresa,” tib ge Salomoba ge mî. ǁÎb ǀaro tsî ai!â ge mî !khais ge, nē ǀgaub aibe mātare tsî ǁgam-e sîsenūs diba ǂgâxa-ūs ge !gâi ǀomkhâisa !ā!khōmais marihōǂgās !nâ ra ǁgau. 

Willie !Horaseb, 60 kurixab tsî a Welcome ǁanǁguib dib ge mîsa !oab ge nē ǀasa sîsenūǀgauba ǂōrisase tsî !ereamxase ǁgam-e sîsenūs di ǁnaetiba ǁîb omaris !nâ ge ǂgaoǂgao!nâ. 

“Sida ge ǂgaoba xu ra gangan, Hôasoreba xu da ge ǁgam-i meterdi sîsenūs ai!â ra ǁamahede a sîsenūtsoatsoa tsî ǁkhâbǀunidi ai ǀgui mâtikō marisats surude hâsa ǂans di !gomma xu a ǂoa !khais !aroma,” tib ge ge mî. 

Petronella ǁGowases, TransNamib ǁanǁguib dis tsîn ge ge mî, ǁîs tsîn, nē kurib di !Khanna xus ǁîs omaris hîas ǀgam ǀgôara ǀkha ra hâs !aroma N$200 di ǁgam-e ǁaupexa ra sîsenūsa. 

“Kai gangansa da ge !ā!khōmaisa ra mā, nēsi da ǁgam-e !ereamxase a sîsenū ǁkhā !khais !aroma. 

ǂAn da a !khais ge ǁgam-i nî toas kara, ots dorpi ǁga ǁgam-e nî ǁama!gû !khaisa. !Gâi a !khais nē meterdi dis ge, ǁnā ǁaeb aits ūhâ tamas ka i o a ǁkhāba maris ǀguis ǀkhats ge a ǁama ǁkhā,” tis ge ge mî. –Nampa