Ovanyasha ve na oikunino koshikandjohoololo shaEtayi ova pewa omakwafo oilongifo i li pongushu yoshimaliwa N$39 000 nelalakano lokukala tava longo noupu moikunino yavo.
Pefimbo ta yandje oilongifo Etitatu, kansela woshikandjohoololo shaEtayi Hans Haikali okwa ti ombelewa yaye otai lalakanene okuyambula po oikunino yovanyasha yomoshikandjohoololo.
Okwa yelifa ta ti ovanyasha ova yambindidwa noshimaliwa sha dja mombelewa yaye osho hashi di kepangalo.
Hans okwa ti omakwafo okwa pewa ovanyasha ve li vatatu keshe umwe e na oshikunino shaye.
“Oikunino oya fimana molwaashi otai etele ovanyasha oyuuyemo okueta po eemhito doilonga nokulwifa ondjala noluhepo,” Hans ta ti.
Okwe weda po ta ti omunyasha ngeenge e na oshikunino ota dulu natango okuyandja omadeulo nokuxwaxwameka ovanyasha vakwao navo va tote po oikunino yavo.“Oshikondo shounamapya osha fimana molwaashi otashi yambula po eliko loshilongo tashi pitile movanyasha ngeenge tava kufa ombinga mokuninga oikunino,” ta ti.
Okwa kumaida ovanyasha opo va twikile okukufa ombinga okuninga oikunino younamapya nelalakano lokulonga oikulya yavo vene.
Hans okwa kumaida ovo va pewa omakwafo opo va longe nelitulemo ndele ha ku hepifa oilongifo va pewa.
“Onda hala okumona oikunino yeni tai xumu komesho, inandi hala mongula ndi hange oikunino yeni tai teka po,” ta ti.
Johannes Kandjimwena, oye umwe wovanyasha va pewa oikunino nokwa pandula ombelewa yakansela wavo eshi ye va yambidida noilongifo.
“Ohandi longa noudinini okuyambula po oshikunino shange. Oilongifo twa pewa otai ke tu etela omauwa moikunino,” ta ti.