OSHAKATI – Omulumentu gomunyasha okwa li a thiki mOshakati nekiti lye eshuushuka omimvo omishona dha piti, nelalakano lyokulundulula onkalo ye osho wo onkalo yaandjawo no kwa kala e na omukumo kutya, siku limwe kemanya naku ka za wo ontsi. 

Sho a li a thiki mOshakati, onkalo kaya li ya taamba ko Simeon Shimwino nawa, ashike ye okwa li e yi taamba ko oshoka ka li e na nkene.

“Nonando nda li nda tsakaneke omashongo ogendji, shoka inashi shololitha ndje oshoka onda kala neyitaalo osho wo nda kala ndi shi shoka nda hala. 

“Onda kala nokwiimba okayimbilo momutima gwandje kutya, nonando nda tsakaneke endangalati lyi thike peni mondjila yandje, ondi na okuthika ashike hoka nda hala okuya,” ta hokolola ngaaka.

Shimwino okwa ti okwa mana ondondo 12 mo2012. Oshoka kapwa li omayambidhidho ga gwana opo a ka tsikile osikola ye, okwa kongo iilonga yokoonyala, ta ti kasha li oshipu ashike okwa kala neyitaalo osho wo eyineekelo muye mwene.

Ta ti, okwa ka mona po etemo limwe ongomukeeleli gomaliko, ashike natango onkalo kaya li tayi nuwa meya, oshoka oowili dhokulonga okwa li oonde ko okamaliwa ota ka shongola.

“Nonando nda kala nokukalela omaliko gaantu uusiku awuhe, ethimbo ndyoka onda kala tandi li longitha, tandi dhiladhila nkene ndi na okuhwepopaleka onkalamwenyo yandje. Inashi kala oshipu okweenda momapandaanda moka niikutu yokukelela omaliko gaantu. Onda li nda lukwa nedhina “Sekeseke” shoka sha kala nokweehama ndje,” Shimwino ta popi ngaaka.

Ta hokolola kutya okwa kala nokuyolwa nokushekwa, ihe shoka inashi mu tulitha omutse miipeta.

Shimwino okwa ti okwa li a dhimbulukwa kutya oku na oshitalenti shoka a kala nasho ihe ka li e shi ngele ota vulu oku shi longitha shi lundulule wo onkalo ye.

“Onda kala omuthaneki okuza kuushona wandje,  onda li nda tokola okuya kosikola yokuthaneka ndi ka nkondopaleke uunongo wandje, koCollege of the Arts. Onda li nda mono onzapo, tandi tsikile niilonga yandje yuusekuliti,” ta hokolola,

Ta ti, okwa kala ta nyangadhala, uuna itaa longo ye ta ka longa okuthaneka, ngaashi komakuma nosho tuu.

Oomvula mbali dha piti, Shimwino natango okwa li e ya po nedhiladhilo lyokuya kosikola, sho a li a tameke osikola yokompiyuta, hoka a kala ti ifutile noshimaliwa shokukelela omaliko osho wou una a thaneke.

“Onda li nda mono onzapo yodiploma mokompiyuta, okuza mpoka onda li nda mono uuwanawa weyilongo, onda li nda tsikile okukonga eyilongo sigo nda ka taambwa koshiputudhilo shopombanda shoInternational University of Management (IUM) hoka nda ka ilongela uulongi, ngashingeyi ondina onzapo yoHonours Degree moSecondary Education,” ta ti ngaaka.

Ta hokolola ta ti, oshoka okwa kala i itula mo meyilongo lye, okwa ka thiga po iilonga, nonkalo oya li ya tameke okunayipala oshoka ka li e na ekwatho lyasha okulanda iikulya osho wo okufuta olukalwa.

Ta ti, okwa ka tameka okwoopaleka omagumbo gaantu opo a vule okumona po sha.

“Onkalo yandje inayi hulila ashike mpoka, nena otandi tsikile eyilongo lyandje lyelongo, ndi li momvula yotango yoMaster’s degree,” ta popi ngaaka.

Shimwino okwa hokolola kutya ondjila inayi kala ompu, ashike okwa kala nokulonga nomadhiladhilo opo a vule okuya komeho.

Shimwino ota kumagidha aanyasha aakwawo ta ti uuwanawa ihau zi pokapala ka yela. Okwa kumagidha wo kutya, inaya nyengwa okutemeka naamboka ya tameka, inaya sholola oshoka iiyimati iiwanawa oyi li komeho.

-vkaapanda@nepc.com.na