Ngoloneya woshitukulwa shaHangwena Kadiva Hamutumwa okwa kunghilila ovanambelewa aveshe tava yandje omakwafo koshiwana unene okudilila moikondo yepangelo, ve shi ninge meendelelo osho yo nondjungu.

Eshi okwe shi popya komutumba wavo oshivike shad dja ko, oo wa li wa nuninwa ovanambelewa vomoshitukulwa, nonghee ve na kulonga novanhu osho yo okuyandja omwakwafo koshiwana. 

Okwa ti ovanambelewa natango nava xulife po onghalo  yokunyamukula ovanhu nai meembelewa, osho yo olungwenye. 

“ Ngeenge omunhu oku udite nale nande okulutu, ove otoya tomu ngwenyuna, natango oto muteyapo vali komwenyo,” ta ti. 

Okwa twikila kutya ovanambelewa otava teya po ekwatafano liwa pokati keembelewa depangelo noshiwana. 

“Omunhu nande okwa hala okupula ekwafo okwa nyanyala ashike shaashi okwa tila okunyamukulwa nai,” ta ti. 

Okwa lombwela ovanambelewa kutya, ove ya okukwafa oshiwana, ndele inave ya okuninga omambungu mokati kovanhu.

Ngoloneya natango okwa kuma yo koshikumungu shokuyandja oilonga she likolela keembuda, noshihe li pauyuuki meembelewa.  “ Fye otwa pumbwa ovanhu ava tava dulu okulonga oilonga moshili, ndele havanhu ava ashike ve li omutumba meembelewa ndele kave shi eshi tava ningi,” ta holola.  Okwa ti oinima yoludi olo oyo hai shunifa exumokomesho pedu moinima ihapu.  Okwa kunghilila yo ovatuvikili vomamona meembelewa, osho yo ovakulunhu veembelewa va tonatele nokukwata nawa oimaliwa, yo i dule okulonga osho shi li mondjila. –Taimihaihambo2000@gmail.com