Ehangano loMiss Namibia ole lipyakidila nomadeulo e na sha noukadona dingi vanini moshilongo, ovo hava ufanwa Miss Teen Namibia.
Ehangano ola yelifa kutya mopaife oukadona ava ove li tava ufanwa semi-finalists shaashi ova teelela natango efiyafano laxuunina olo tali ke va twala mondabo yomafiyafano oshishani notai ka dja ashike oukadona omulongo.
“Oukadona ava paife ove lipyakidila nokweeta po eepoloyeka kuvo vene, oku lideulila okweenda, okuninga omaxwaxwameko, okutalela po omaumbo ovakwanaluhepo pamwe novakulupe, okufanekwa omafano opambelewa osho yo oku landifa outekete voxungi youkodona dingi omulongo,” ehangano tali yelifa.
Oukadona vanini dingi ava hava hoololwa va ka kelele po oshilongo mongudu younona vanini, ohava kala okudja peedula 13 fiyo 19.
Vahapu vomuvo ohava kala ve li mofikola yopedu, nohashi kala shiwa shaashi ohava kaleke po eefikola davo, noku di tula pondodo iwa.
Omalihafifo oludi eli ohaa kwafele ounona va holole oitalendi yavo, osho yo etwomukumo mokulamba eendjila daashi ve hole okuninga.
Efiku lomafiyafano axuuninwa natango inali tumbulwa osho yo onhele apa tapu ka ningilwa omafiyafano aa.