Rundu- nguuru gomukunda Kavango zoutokero Sirkka Ausiku katente asi epiro magwanekero panongodi kuna kara udigu unene momukunda horowero. Ausiku kageve nonkango posiruwo sokugava mbudi zendi zina yuka kovatungimo momukunda gwaKavango zoutokero modoropa zaNkurenkuru moutano una puko, nokutanta asi mokukwama yitundwamo yava wokuvarura vantu mosirongo noyiweka yawo, Namibia Statistic Agency, 29.1% vantu owo vana kara momukunda asi kwato kapi vana kara nonofunguna dokomawoko. 

Magwanekero gana kara mulyo unene ngesi kuna kusilika, nompito kovantu vakara momukunda momaruha ngwendi erongo, nombanga ntani uhaku ngoso, yimo ana kutanta.

‘’Nampili ngoso, mukunda guna hafa morwa kutulisapo ruhungu rorupe projeka zina kara asi simpe kuna kuza komeho. Mukunda simpe kuna kuhundira asi ruhungu roRadio naro vahepa kurugwederera oru runa kara ngesi asi po 78% ano TV kuna kara nye po 74.5% yimo ngoso ana kugwedako. Apa nye yina kuwiza kokugwanenako nombudi, kwava vakara asi yiwo vana kupapara nombudi, Ausiku katente asi ministeli zomapukururo nomagwanekero momukunda kuna kara asi yizo azi gwana nombudi dangesi. Age kahundilire NBC egendeso lyawo asi vahepa kukutako muntu ndi vantu vana kara asi awo wosinka saKavango zoutokero. Ano apa nye tuna kuhuyunga ngesi, NBC kuna kara nomberewa zimwe tupu zina kara moRundu moKavango zoupumezuva. Ministeli zo MICT mberewa zawo zomomuknda kugava internet ndi magwanekero aga mawokowoko kovadinakntu, ntani kuna kugava madeuro kuruganesa kompuyuta, yimo ana kuyididilika.

 Dongoro ngesi, kuna kara sivaro sovadinkantu wokusika ko 135 vana gwanenemo uwa melikwamo lyangesi. Komavango nye gokulivaterera ndi asi yikasayise, nguuru katente asi mukunda kuna lituramo unene mokutura nayinye eyi mosirugana unene konomukunda doponze zodoropa. ‘’ Konyara kusika ko 100 yiaksayise eyi vanadike meyereko lyosimaliwa tuna kara ngesi, eyereko lyosimaliwa lyokusika ko N$2.3 nomiliyuna kwayiyerekera asi yiyo nye navaruganesa vagusepo udigu wangesi momukunda.” Yimo ana kutanta Ausiku. -Nampa